Arratsaldeko 19etan piztu du Josefina Burutxaga aurtengo pregoilariak Josune Irabien alkatearekin jaien hasiera agintzen duen suziria. Txupinarekin batera, Iguarrakoak Juan de Urrutia plaza gurutzatzeko ibilbideari ekin dio, baina arazo teknikoak direla medio, ez aurrera ez atzera geratu da ia 10 minutuz. Azkenerako berriz ere bere bideari ekin dionean, mozorratutako bi gaztek herriko eraikin bat okupatzeagatik udazkenean epaiketa izango duten gazteei erreferentzia egiten zion "Stop epaiketak" zioen txartela eskegi dute Iguarrakoa eusten zuen sokan, baina udaltzainek berehala kendu dute jaietako ikonoa den piztiak udaletxera arteko bidea egin zezan. Iguarrakoak baina, ez du udaletxeko balkoian zai zituen kuadriletako eta instituzioetako ordezkariengana iristerik izan. Jaia, hala ere, lehertu da herrian.
Jaien hasierako suziria bota baino lehenago, pregoia irakurri du Josefina Burutxagak, Arabako Odol-emaileen elkarteak Amurrion duen ordezkariak. Aurtengo "Urrezko Guk" saria berak jaso du, odol-emaile bezala egindako lanaren aitortza jasoz horrela. Pregoian ere gogora ekarri nahi izan du elkarteak egindako lanaren garrantzia, eta langintza horretan aurrera egiteko gonbidapena egin die bertaratutakoei.
Pregoiaren irakurketaren ondoren kuadriletako jaietarako ordezkariak izendatu dituzte eta dagokien xingola jarri diete. Aurtengo ordezkaria