Uztailean egindako ohiko Udal Osoko Bilkuran Amurrioko alderdi gehienek erabaki dute uraren kudeaketa Kantauriko Urkidetzaren menpe uztea. PSE, EAJ eta Bildu ekimenaren alde agertu dira eta PPk aurka egin du.
Josune Irabien alkateak azaldu duenez: "orain egin dena konpromisoa da, kronograma ezarri dugu eta horren arabera aurrera pausuak emango ditugu Kantauriko Urkidetzak uraren hornidura eta saneamendua kudeatu ditzan. Esleipena egin behar da, zehaztu behar da zenbat langile behar diren...". Helburua da partzuergoak hornidurarekin harremana duten esparru guztiak bere gain hartzea.
Baina hori baino lehen birjarpen eta finantzazio plana garatu behar du Udalak jakiteko asmoa bideragarria den. Behar diren inbertsioen arabera berretsiko da erabakia.
Europako zuzentaraua
Uraren horniduraren eta saneamenduaren kudeaketa Kantauriko Urkidetzaren esku uztea Europar Batasunak zehaztutako zuzentarauaren ondorioa da. Erakunde europarrak agindu du uraren ordainagiriaren bitartez bezeroek uraren hornidurak sortzen dituen gastu guztiak ordaindu behar dituztela. Gaur egun, bataz beste, %50 ordaintzen da horrela eta.
Alderdien arteko eztabaida
PPk erabakiaren aurka bozkatu du. Alde batetik, Popularren ustez erabaki hori dela eta gehiago ordaindu beharko dute bezeroek. Bestalde, orain arte kudeaketa udal langileek egin dutenez, haien ustez, lanpostuak bikoiztuko dira.
Bilduk, aldiz, gogoratu zuen Europako zuzentarauaren harira kostua derrigorrez garestituko dela eta partzuergoaren bitartez zerbitzua optimizatu daitekeela. EAJk, alkatearen bidez, azpimarratu du udalak ahal duen moduan eman duela zerbitzua, azpi-kontratazioen bidez, adibidez. PSEk babesa eman dio asmoari, alderdiak zerbitzuak erkidetzearen alde baitago.