Dagoeneko Amurrioko jaien egitaraua itxi da. Udal ordezkariak aurkezpena egin dute eta musikak izango duen garrantzia goraipatu dute. Jaiek 153000 euroko aurrekontua izan badute, 43426 euro musika ikuskizunetara bideratu dira.
Esparru horretan hitzordu aipagarrienak Vendettak eta Hueccok eskainiko dituzten kontzertuak izango dira. Vendettak abuztuaren 10ean joko du 24:00etan. Huecco, aldiz, 14ean arituko da Amurrion, 24:00etan ere. "Dame vida" biraren baitan kokatuko da emanaldia.
Herritar guztien gustuak aintzat hartu dira
Josune Iraibienek azpimarratu du egitarauaren helburua dela herritar ororen gustuei erantzutea. Hori dela eta, ekitaldi ugari eta anitzak jaso ditu Udalak prestatutako jai eredua.
Kirolak -plater tiroketa, xakea, futbola, txirrindularitza, pilota-, zezenketek, antzerkiak, euskal dantzek, bertsolaritzak, herri kirolek, tokiko ekoizleen produktuek, gastronomiak, dantzaldiek... bere tartea izango dute.
Kirolaren aldetik abuztuaren 10ean Olaizola II-Zabala bikoteak Bengoetxea VI-Beroizen aurka jokatuko du 18:00etan Udal Pilotalekuan.
Ohitura eta partaidetza
Alde batetik, Udalak babesa eskaini nahi die koadrilei pasa den urteko gertakariak berriro errepika ez dadin. Bestalde, herritar talde batek Iguarrakoaren agurra berreskuratu nahi du eta horretarako deialdia zabaldu dute. Egun horretan herritarrek dolu eguna izango balitz bezala janzteko ez ezik, umeen txupeteak jasotzeko ere. Txupete horiek Iguarrakoak eramango ditu.
Aldaketak
Aurten jaiak bi zatitan banatuko dira. Abuztuaren 9an hasiko da lehen zatia eta 11n bukatuko da. Bigarren zatia 14ean hasi eta 17an amaituko da.
Zezenketei dagokionez aldaketak egongo dira diruaren aldetik. Aurten 10000 euro gutxiago erabiliko dira -22000- eta 2009an kitatuko 91000 eurotik oso urrun geratuko da inbertsioa.