RAKEL SALGADO (Laudio, 1985) publizitatean litzendiaduna da baina Maritierra denda irekiko du bihar Amurrioko Aiara Etorbidean, 6an. Tokiko ekoizpena eta agroekologia du ardatz dendak.
Zein da zuen proeiktua?
Gure proiektua da denda ekologikoa eta artisau-elikagaiak salduko duena.
Saiatzen ari gara tokiko ekoizle eta nekazariei lehentasuna ematea. Baina tamalez gertatzen dena da produktu batzuk hemen ez direla ekoizten. Produktu horiek saiatuko gara ekartzen banatzaileen bidez.
Dena den, guk nahiago dugu ekoizlearekin harreman zuzena izatea. Mota askotako jakiak izango ditugu: fruta, barazkiak, zereala, gazta, ogia arrautzak, barazkijaleentzako produktuak, lekaleak, esnea, itsas kontserbak, mermeladak, eztia...
Zeri jarriko diozue arreta berezia?
Guretzat gai ekologikoa oso garrantzitsua da. Jaki ekologikoak ezinhobeak dira osasunaren aldetik, bioaniztasuna bultzaten dute, manipulazio genetikotik libre daude, animalien bizi kalitatea hobeagoa da, nekazarien autonomia eta landa eremuko garapen egonkorra bultzatzen dute eta lanpostu gehiago sortzen dituzte, pestizida eta makinen ordez eskulana erabiltzen baita.
Zein ibilbide mota egin duzue ideia gauzatu arte?
Gaur egun diru-laguntzarik ez dago. Zeozer irekitzekotan, zure kabuz egin behar duzu, laguntza handirik ez duzu izango eta.
Ideia gehienbat sortu zen nire bikotekidea eta biok langabezian geratu ginelako. Aurrera egiteko bide hau aukeratu genuen.
Kontzientzia sortzeko parada ere bada. Batez ere gaur egun elikadura subiranotasunaren inguruan hitz egiten da eta arlo horretan uste dut lan egin behar dugula.
Zeintzuk dira kontzeptu horren atzean dauden ideiak?
Elikadura subiranotasuna egungo nekazal industriarekiko paradigma alternatiba dugu zenbait oinarritan sostengatuta:
Elikadura gizakiaren oinarrizko eskubidetzat onartzea eta herri eta estatu guztioi euren abeltzantza eta nekazaritza eredua garatzeko eskubidea onartzea.
Elikagaiak mundu mailako ekoizpen eta finantza sare izugarrien zati dira nazioarteko enpresen mende. Mundu mailako sare eta merkatuen gaineko erabakiak herritarrak ordezkatzen ez dituzten esparrutan hartzen dira. Esate baterako Mundu Bankuan edo Nazioarte Diru Funtsan. Hori dela eta, elikadura eskubidea izateari utzi du eta merkatugai hutsa da.
Duela gutxi tokiko ekoizle eta kontsumitzaile sarea sortzeko bilera egin zen, zeintzuk izan dira emaitzak?
Momentuz ideia hor dago. Badago jendea zeozer egin nahi duena baina ez da ezer zehaztu. Guk ahal dugun laguntza guztia emango diegu baina une honetan, esan dudan bezala, ez dago ezer zehaztuta.
Guk printzipioz dozena bat tokiko ekoizleekin hasi gara lanean.