Abenduaren 17an (larunbata) ospatuko da Amurrion Berdintasunaren Aldeko Herri Lasterketaren V. edizioa. Aurreko edizioetan bezala, Oinkariak Atletismo Kluba arduratu da antolakuntzaz, Udaleko Berdintasun eta Kirol Sailekin elkarlanean.
Lau lasterketa izango dira guztira, mistoak laurak. 16:15etan abiatuko da Lasterketa Herrikoia (16 urte baino gehiagokoena), Juan Urrutia plazatik. Zortzi kilometroko luzera izango du proba horrek. 17:10etan, berriz, 10-15 urte bitartekoen txanda izango da. Kilometro bateko ibilbidea egin beharko dute herrigunetik.
17:25etan 5-9 urtekoak abiatuko dira, eta 17:40etan 0-4 urtekoak. 500 metroko luzera izango dute azken bi proba horiek.
Izen-ematea, aurretik
Adin-txikikoek lasterketaren egunean bertan eman ahalko dute izena, probak hasi baino 30 minutu lehenago, euro baten truke. Adin nagusiko parte hartzaileek, baina, aurretik eman beharko dute izena www.sailkapenak.com web-orrialdean, sei euroren truke. Izen-ematea mugatua izango da, 300 korrikalari egon ahalko baitira gehien jota. Dortsalak egunean bertan banatuko dira.
Zaraobeko emakumezkoen taldea omenduko dute
Zaraobe Saskibaloi Klubeko nesken taldeko kideak izango dira Berdintasun Lasterketaren aurtengo edizioko omenduak.