“Aiaraldea euskaldun!” lemapean konpromiso eta maitasunez bete da Amurrio. Ehunka lagun batu dira Euskararen Nazioarteko Eguna dela-eta, Aiaraldeko Euskalgintza Kontseiluak deitutako ekimenera. Txiki geratu da Amurrioko Juan Urrutia plaza. Izan ere, Urduña, Artziniega, Amurrio, Okondo, Arrankudiaga-Zollo, Arakaldo, Laudio, Aiara eta Orozkoko ehunka norbanako eta erakundeek parte hartu dute ekitaldian.
Bertsolarien ondotik sortu dute konpromisoen lorategia. Giro ederra medio, euskararen erabilera areagotzeko hartuko dituzten konpromisoak “mikro irekian” azaldu dituzte horietako batzuk. Urduñako Herri Ikastetxeko Gurasoen Elkarteak, adibidez, komunikazio euskarri guztiak elebitan egingo dituela hemendik aurrera aipatu du; eta Arrankudiagako Gizarte Etxeko kide batek bilerak eta ekintzak euskaraz egiten saiatuko direla. Haur eta gazteek ere hartu dute hitza, euskaraz bizi nahi dutela adierazi duten bi saharauiarrek kasu. Aiaraldeko Euskalgintza Kontseiluaren mezua zabaldu dute jarraian, eta ondoren, eskualdeko artistek sortutako “Euskararen errota” abestiarekin flashmob-a grabatu dute.
Bide ezberdinak, helmuga bera
Goizean goizetik, hainbat bide eta modu aukeratu dituzte herritarrek 12:00etan Amurrioko plazara iristeko. Batzuk, Nerbioiko parke linealeatik oinez bertaratzea erabaki dute. Beste batzuk, berriz, patinak eta bizikletak hautatu dituzte. Laudiotik, esaterako, musika eta eguraldia lagun, 10 patinatzaile eta 50 txirrindularitik gora elkartu dira errepidean barrena. Hala, 11:30ean Amurrioko hiru puntutaatik abiatu dira zutabeak Juan Urrutia plazarantza. Guk eskulturaren inguruan, adibidez, Artziniegako Builaka batukadaren erritmora girotu dituzte kaleak. Bateko zein besteko, kalejira hasterako bete-bete zegoen Herriko plaza.
Mugarri berria
Aiaraldeko Euskalgintza Kontseiluak Euskararen eguna ospatzeko deialdi bateratua egin duen lehen aldia. Dinamika oso positiboki baloratu dute antolatzaileek, “egun historikoa da guretzat, jende asko batu da”. Horregatik, gaurko eguna “mugarri” izatea espero dutela erantsi dute, eta euskarak 365 egun dituela-eta, lanean jarriatuko dutela konpromiso eta maitasunez Aiaraldea euskalduntzeko.