Amurrio Bidean tokiko garapenerako erakundea sortu zuen udalak duela 10 urte, eta ibilbide hori ospatzeko jardunaldia egingo du gaur Reforren.
19:00etan hasiko da hitzordua eta Josune Irabien alkateak eta Cristina Gonzalez Arabako Foru Aldundiko Enplegu, Merkataritza era Turismoko diputatuak parte hartuko dute. Horrez gain, 10 urteotako historia azaltzeko bideoa emango dute.
Halaber, Iker Merchán “La Salve” garagardo enpresako sortzaileak hitzaldia emango du.
Emakume ekintzaileen lana ere aitortuko dute eta, bukatzeko, tokiko produktuak dastatuko dituzte.
Ibilbide oparoa
Amurrio Bidean tokiko enplegua eta ekonomia sustatzeko eratu zuten eta 4 langile ditu. Refor Amurrio Enpresaldean kokatuta dago eta zenbait areto eta enpresa hazitegia eskaintzen dituzte, besteak beste.
Berez, 10 urtetan 35 enpresa egon dira bertan, eta egun 7 daude. Aholkularitza eta bideragarritasun planak osatzeko laguntza ere ematen dute eta, esaterako, 718 laguni eman diete. Horien artean, 164k negozioa abiatu dute.
Hori gutxi balitz, beste 814 enpresa-kontsulta gauzatu dituzte eta 135 trebakuntza ikastaro antolatu. Guztira, 3.815 trebakuntza-ordu prestatu dituzte eta horietan 735 gizonezko eta 915 emakumezko aritu dira.
Merkatuko aldaketei erreparatzen saiatzen dira eta Pop Up edota Coworking saioak antolatu dituzte. Orain ingurumenari loturiko proiektuak garatzen ari dira, baita Aiarako demola proiektua, adibidez.