Maider Iglesias Aranzadiko kideak idatzita:
Animalia, landare eta onddo espezieak mundu guztian desagertzen ari dira, batez ere gizakiaren eragina dela eta. Biodibertsitatea gure ondare naturalaren zati garrantzitsua da eta horregatik zaindu behar dugu. Aiaran, gainera, oraindik ere ondo kontserbaturiko lekuak topa ditzakegu eta horiei lotuta animalia bereziak ere.
Biodibertsitate guzti hori gizarteari hurbiltzeko asmoarekin Amurrioko Udalak jardunaldi batzuk antolatu ditu. Maiatzaren 22an biodibertsitatearen eguna ospatzen da mundu osoan eta ospakizun horren inguruan antolatu dira jardunaldi hauek. Maiatzaren 17an, ostirala, izango da lehenengo hitzaldia eta ekainak 7rarte luzatuko da ekitaldia. Oso gai desberdinak jorratuko dira hitzaldietan; sugeak bezalako narrasti bereziak; zetazeoak; aldaketa klimatikoak hegaztiengan daukan eragina; eta haien baliagarritasuna oraindik kolokan daukaten kontserbazio teknikak.
Gainera, hegaztiak ikusteko mundura hurbildu nahi duenak, hementxe izango du aukera, maiatzaren 25an, larunbata, txoriak ikusteko mendi-irteera antolatu delako. Informazio gehiago atxikita doazen eskuorrietan lor dezakezu.
Hitzaldiak Amurrioko Katekesi Aretoan izango dira maiatzaren 17, 24, 31 eta ekainaren 7an, arratsaldeko 19.30tan.
Txoriak ezagutzeko mendi-irteera, aldiz, maiatzaren 25an egingo da, goizeko 8.00tan Amurrioko Juan Urrutia plazako kioskotik aterata.
Parte hartzeko Amurrioko udaletxean aurretik izena eman behar da.