aiaraldea.eus

"Lanbide Heziketa euskaraz, aukerarik onena!" dela bultzatzeko kanpaina abiatu dute

Erabiltzailearen aurpegia Erredakzioa   Hezkuntza  Amurrio
"Lanbide Heziketa euskaraz, aukerarik onena!" dela bultzatzeko kanpaina abiatu dute

Lanbide Heziketa euskaraz bultzatzeko hautua egin du Zaraobe Institutuak. "Behar genuela argi izan dugu hasieratik"  Iñaki Rodrigo Lanbide Heziketen arduraduradunaren esanetan urte asko igaro dira hezkuntza mailan eta hainbat aurrerapenak eman dira ereduen arloan: "Euskarazko Lanbide Heziketaren eskaintza, ordea, ez da gaur egun, ziurrenik, %10-%11ra ez da iristen".

Egilea: Iñaki Rodrigo Etxebarriarteun, Amurrioko Zaraobe BHIko zuzendari ondokoa eta Lanbide Heziketako arduraduna

Zaraobe Institututik Lanbide Heziketa euskaraz bultzatu behar genuela argi izan dugu hasieratik. Urte pilo igaro dira hezkuntza mailan eta hainbat aurrerapenak eman dira ereduen arloan etab. Baina, euskarazko Lanbide Heziketaren eskaintza, gaur egun, ziurrenik, %10-%11ra ez da iritsiko. Beraz, Lanbide Heziketari dagokionez, euskarazko formatuan eskaintza oso urria zela ikusi genuen eta Zaraobetik prest agertu ginen erronkari aurre egiteko.

Lanean hasi ginen orain dela urte batzuk, Goi Mailako Zikloa euskaraz eskaintzen eta aurrera ateratzen. Gaur egun, ziklo guztiak euskaraz eskaintzen ditugu. Dagoeneko, 66 ikasle inguruk parte hartzen dute “Mekanizazioa”, “Mantentze Lan Elektromekanikoa” eta “Menpeko Pertsonei Arreta” erdi mailako zikloetan eta “Mekatronika Industriala” goi mailako zikloan euskarazko ereduetan.

Grafiko honetan lehenengo eta bigarren mailako ikasle kopuru euskaldunak ikus ditzakezu, ikasturtez ikasturte. Edo hobe esanda, euskarazko eredua aukeratzen dutenak, euskaldunak gehiago direlako.

Gure helburua, euskaraz matrikulatzen diren ikasle kopurua handitzeaz gain, esparru honetan euskararen normalizazioa sustatzea da. Hau da, Lanbide Heziketan klasketik aparte arlo guztietan euskaraz funtzionatzea: erabiltzen diren material didaktikoak (% ), barneko dokumentazioa, bilerak, paisaia, baliabide informatikoak, lantokian prestakuntza euskaraz egitea, hornitzaileekin  harremana, irakasleen erabilpen zuzena, etabar.

Une honetan administrazioak ematen duen aukera hauxe da: ikasle kopuruaren arabera, ziklo mistoa ateratzea; hau da, ziklo horren modulu batzuk erdaraz eta beste batzuk (ordu kopuru gehienak biltzen dituenak) bikoiztuta, euskaraz eta gaztelaniaz, aukeratutako ereduaren arabera.

Bidean gaude. Epe motzean zikloak euskaraz soilik aurrera ateratzea espero da. Horretarako matrikulazioa handitzea eta sendotzea beharko genuke. Dudarik gabe, Lanbide Heziketa euskaraz, aukerarik onena.

Ikusi argazki guztiak handiago

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa