JAIONE VELEZ (1990, Amurrio) artista da eta Martxoaren 8an, beste hiru artistekin batera "Emakumea" proiektua aurkeztu zuten Amurrioko La Casonan. Martxoaren 24an bukatuko da erakusketa.
Zertan datza prestatu duzuen ekimena?
Lau emakume gara eta arte ederrak ikasi ditugu. Ni adibidez lizentziatua naiz eta keramika masterra egiten nago. Horregatik nire lana keramikan eta eskultura oinarritzen da batez ere. Kasu honetan hezkuntza artistikoarekin harremana duen ariketa artistikoa prestatu dut bisitariarentzat.
Bertan galderatxo batzuk utzi ditut bisitariak pentsa eta erantzun ditzan. Helburua da koadro edo artelanen aurrean ideia batzuk sortzea, kezkak ere sortzeko.
Ni Amurriokoa naiz, Iera eta Irati Balmasedakoak eta Verónica Algortakoa.
Zerk eraman zintuzten zu eta gainontzeko kidei erakusketa egitera?
Gogoak, batez ere. Aurrerapausu bat ematea. Ikasleak gara eta hasteko gogoak ditugu. Aldi berean emakumeak gara eta Martxoak 8 data garrantzitsua da eta hori aprobetxatzea emakumearen inguruan zeozer adierazteko ideia ona zen.
Emakumea da mezua?
Denetarik landu dugu. Emakumea ikuspuntu plastikotik, naturaletik jorratu dugu eta gure bizipen bitartez ere mintzatu gara kritika soziala adierazteko. Emakumearen kontrako bortizkeriaz, adibidez.
Diziplina guztiak landu ditugu; margoa, eskultura, argazkilaritza eta bideoa. Garai honetako aukera guztiak aprobetxatu ditugu horretarako.
Momentuz zer nolako harrera izan du erakusketak?
Inaugurazioa ederra izan zen. Jende asko hurbildu zen eta partehartzailea izan zen. Erakutsi dudan koadroak izenburua eskatzen dio publikoari eta izenburua jarri baino, pertsonek haien arteko elkarrizketak sortu zituzten. Argudioak koadroan agertzen ziren atal ezberdinetan oinarritzen ziren eta baita bere bizitzetan ere. Oso gauza interesgarriak atera ziren eztabaida horietan. Beraz, oso pozik nago.
Mito bat dago artearen inguruan. Eta mito horrekin apurtu behar da. Erakusketa aurrera pausu bat da zentzu horretan. Galdera errazak planteatzen ditu eta ikuslea aktibatzeko balio dute.
Etorri ziren guztiei eskerrak eman nahi dizkiet eta etorri ez direnak animatu nahiko nituzke. La Casonan goizez ibiliko naiz egunero nahi duenarentzat eta erakusketa interesgarria dela uste dut. Koadroek haien artean hitz egiten dute, oso lotuta dago dena, agian fakultate berekoak garelako artistak. Ez da collage bat. Elkarri laguntza eta aholkuak eman dizkiogu.