Amurrioko Udala eta herriko Gazte Asanblada pultsu batean murgilduta daude. Gazteek izango duten epaiketaren erantzunkizuna Udal taldeari leporatzen dioten bitartean, Amurrioko EAJk bere iritzia zabaldu du ohar baten bitartez.
EAJren aburuz, beti egon da prest Gazte Asanbladarekin hitz egiteko eta gazteen beharrak bideratzeko. Dena den, Amurrioko Udalak ez du, haien iritziz, gazteek behar duten azpiegitura "Gazte Lokala" lagatzeko.
Zentzu horretan, udalak dio Landazuri etxea -AGAk okupatutako eraikina- ez dagoela egoera egokian. Gainera, jabeek udalari utzi zioten etxea pertsona helduen beharrei erantzuna emateko, eta ez beste helburu batekin.
Hala ere, EAJk adierazi du prest egon dela gazteekin negoziatzeko, baina hauek epaiketa bukatu arte ez dutela erakunde publikoarekin harremanetan jartzeko asmorik.
Epaiketaren erantzunkizuna eta mehatxuak
Udalak salatu dituen gaien artean azpimarratu izan nahi du ez dela bere egitasmoa Landazurin identifikatutako 9 gazteak epaitzea, Ertzaintzarena baizik. Udalak eta alkateak ez dutela salaketa jarri ziurtatu du EAJk.
Horregatik, Udalak leporatu dio Gazte Asanbladari gezurrak esatea. Eta ez hori bakarrik, kartelen, pankarten eta magoketen bidez pertsona zehatz batzuk mehatxatzea egotzi dio ere.
EAJren ustez, beste garai batzuetako jarrerak dira hauek eta jokaera faxistatzat jo ditu.