Eusko Jaurlaritzak Arrastariako inguruetan egin nahi dituen ikerketak Fracking teknikaren eztabaida azalaratu du. Fracking Ez Plataformak Bilduren eskutik Amurrioko Udalean aurkeztutako mozioa onartu zen atzo.
Testuak Fracking teknikak airea, ura eta gizakiak kutsatzeko arrisku handia sortzen duela salatzen du. Era berean mozioak jasotzen du Udalak gasa ateratzeko ez ohiko teknika honen aurka dagoela adierazteko kartelak jarriko beharko direla.
Ekimenak Bilduren babesa baino ez zuen jaso. PSEk eta PPk aurka bozkatu zuten eta EAJ, aldiz, mozioaren puntu gehienekin ados zegoela adierazi arren, abstenitu egin zen, puntu guztiekin ez baitzuen bat egiten.
Gainontzeko Udal Osoko bilkura
Udaletxean gai gehiago landu ziren atzo. Terraza eta mahaitxoen araudi berria onartu zen. Alderdi guztiek alde bozkatu zuten Bildu izan ezik. Koalizioaren aburuz, HAPOa eta Irisgarritasun araudia onartu ez direnez, epe laburrean araudien arteko kontraesanak sortu daitezke eta ostalariak izango dira kaltetuak.
PSEk aurkeztutako eta EAJrekin transatutako beste bi mozio ere landu ziren Udal Osoko Bilkuran. Lehenengoan Elizak OHZ ordaindu dezala eskatzen zaio Espainiako Gobernuari. Bigarrenean OHZren inguruan aldaketak egitea eskatzen zaio Foru Aldundiko Batzar Nagusiei, hauek zehazki: eguneraketa epea 5 urtekoa izatea, zuzenketa faktore bat gehitzea, OHZ ordaintzen ez duten eraikinen errolda bat egitea eta katastroak sortzen dituen gastuen %100 Foru Aldundiak ordaintzea.
PSE, EAJ eta Bildu bi mozio hauen alde agertu ziren eta PP aurka.