Frackingnari eta Tubacex lantegiko gatazkari buruzko hitzaldiak ere egongo dira
Gaur emango zaie hasiera osasunaren autogestioaren inguruko jardunaldiei Amurrioko Hauspoa lokalean (Dionisio Aldama 5). Osasun holistikoari sarrera izeneko hitzaldia egongo da gaur bertan, arratsaldeko zazpi eta erdietan.
Aste bat itxaron beharko da baina jardunaldien jarraipenerako. Bigarren zita hori Yoga tailer bat izango da eta hurrengo asteazkenean egingo da, arratsaldeko zazpietan. Handik hiru egunetara, maiatzaren 11an, erlaxazio tailer bat egingo da arratsaldeko seiak eta erdietan. Hurrengo egunerako elikadura eta naturopatiari buruzko hitzaldi/tailerra dute antolatua Hauspoako kideek. Maiatzaren 18an barreterapia izango dute mintzagai arratsaldeko zazpietatik aurrera, eta 19an terapia mota hori praktikan jarriko dute, arratsaldeko seietan.
Auto-estima izango da 26an jorratuko duten gaia, goizeko hamabietatik aurrera; eta azken zita 31an izango da, arratsaldeko zazpietan, masaje tailerrarekin.
Frackinga eta Tubacex
Osasuna ez da izango Hauspoa lokalean maiatzean jorratuko den gai bakarra. Hala, Frackingnari buruzko hitzaldi bat egongo da bihar, arratsaldeko zazpietan. Frackingna lurpetik gasa ateratzeko teknika bat da, apurketa hidraulikoaren bidez egiten dena eta polemika handia sortu duena Euskal Herrian.
Hurrengo asteko ostegunean, aldiz, Tubacex enpresaren Laudioko lantegian dagoen gatazka izango da mintzagai, arratsaldeko zazpietan.
Asanblada irekiak
Hauspoa topaguneko kideek asteazkenero egiten dituzte asanbladak, arratsaldeko zazpietan, egoitzan bertan, proiektuaren kudeaketa nola egin eztabaidatu eta ze ekintza egin erabakitzeko. Hala, aiaraldeko herritarrak proiektuan parte hartzera animatzen dituzte.