Gaur Gasteizen eskaini duten agerpen publikoaren bitartez, Tubos Reunidos enpresako langileek euren egoeraren berri eman dute. Lehenik eta behin, atzo egindako 24 orduko lan-uztean zehar Ertzaintzak jokatu zuen paperaren inguruko balorazio bat egin dute. Langile batzordearen ustez: "poliziak gaizkileak izango bagina bezala tratatu gintuen".
Enpresaren historia guztian eman den gertakari gogorrena bizi izan atzo, langileen iritziz. Ertzaintzak 3 behargin atxilotu zituen, haien artean, bat zauritu zuen -lepoan lesioak ditu eta 8 puntu josi zizkioten ahoan- eta beste 5 salatu zituen ere. Salatuak hurrengo astean epaituak izango dira Amurrion.
Bortizkeri hori piketea bere lan informatiboa egiten ari zen bitartean eman zen eta sindikatuek informatzea guztiz zilegizkoa dela gogoratu dute.
Iñigo Cabacasi aipamenak
Bestalde, polizien jarrera erasokorra azpimarratu dute langileen ordezkariek. Horren adibide bat jarri dute, ertzainek Iñigo Cabacasen heriotza aipatu baitzieten grebalariei, mehatxu moduan.
Erantzuleak eta negoziazioa
Langile batzordeak enpresako zuzendaritzari leporatu dio gertakarien erantzunkizuna. Nahiz eta zuzendariak gertatutakoa sentitzen duela gaur adierazi, langileek mantentzen dute berak eskatu zuela polizien presentzia.
Bukatzeko, sindikatuen ordezkariek jakinarazi dute bidezkoa den hitzarmen kolektibo baten alde jarraituko dutela borrokatzen eta salatu dute ere enpresak azken lan erreforma erabili nahi duela beharginen eskubideak urratzeko. Goi-zuzendaritzak 1,5 miloiko etekinak 5 pertsonen artean banatu duen bitartean, beharginen diru sarrerak eta giza-zerbitzuak murriztu nahi duela esan dute prentsaurrea eman dutenek.
Hori dela eta, bihar zuzendaritza eta batzordea batzartuko dira eta 25ean eta 28an iragarritako lan-uzteak mantentzen dituztela berretsi dute langileek.