Pepín Laña (1934, Bilbo) gizon apala eta eskuzabalak, Santa Marina de Olarri elkarteak ematen duen Isidro Arteta Folklore saria irabazi du aurten. Ez da hau jendearen esker ona jasotzen duen lehen aldia, 1995. urtean Urteko Amurrioarra izendatu bait zuten herri bozketa baten bitartez.
Isidro Arteta saria jaso eta gero, nola sentitzen zara?
Nire ustez ez dut merezi, egia esanda, baina Done Roke auzoko pertsona batzuk proposatu ninduten saria irabazteko. Deitu nindutenean irabazi nuela esateko, pentsatu nuen lehen gauza zera zen, ez nuela merezi. Baina bozketa baten bitartez erabaki zutenez gero, mespretxu bat iruditu zitzaidan saria ez jasotzea, batipat nigan bere konfidantza jarri dutenekiko. Beraz, saria onartu nuen.
Azkenean, ospakizuna oso atsegina izan zen, lagunez inguratuta egon nintzen eta. Dena den, egin ditudan gauzak ondo sentitzen naizelako egin ditut. Noizbait sari bat eman badidate, onartu dut lehen aipatu dudanagatik, baina inoiz ez dut pentsatu sarietan.
Zergatik uste duzu jaso duzula sari hau?
Eman dituzten arrazoiak ezberdinak izan dira. Alde batetik, Amurrioko Banda Musikan lan egin dudanagatik saritu naute, baita ere abesbatzan abesteagatik eta katekista izategatik. Aipatu zuten ere bosniar errefuxiatuak lagundu nituela. 1992. urtean abesbatzan proposatu zen errefuxiatu hauek laguntza behar zutela eta ni aurretik erretiratu nintzenez, lan horri ekin nion. Dena den, esan beharra dago nik baino lehen beste hamar pertsonek jaso dutela Isidro Arteta saria. Aurten niri tokatu zait, besterik gabe.
Gaur egun Amurrioko pare bat abesbatzekin egiten dut lan eta Urduñako Musika Bandaren ordezko zuzendaria naiz.
Norbait Isidro Arteta saria irabazteko bozkatu beharko bazenu, nor izango litzateke?
Bozketa hau Done Roke auzoan egiten da bakarrik, beraz ezin dut bozkatu, baina hurrengo urterako nere emazteak Amurrioko Olentzeroa proposatuko du. Eta nik berdin pentsatzen dut.