Lokal berri bat hasi zuen bere ibilbidea Amurrion, Dionisio Aldama kaleko 5. zenbakian hain zuzen ere, abenduaren 11an. Hauspoa deituriko proiektu honek Aiaraldeko gizarteari topagune berri bat eskaini nahi dio, bertan burutuko diren hizaldi, mintegi eta proiekzioak nahi duenak goza ditzan.
Honetaz aparte, Hauspoan ekimen ezberdin hedatuko dira dituen bi solairuetan; liburutegi bat, testu eta musika alternatibo eta kritikoen banaketa, irakurtzeko, eztabaidatzeko eta tea hartzeko txoko bat edota kolektiboen arteko infogune bat, kartelak eta beste material mota trukatzeko eta zabaltzeko asmoarekin. Lokalaren inaugurazioa igandean ospatu zen. Aurkezpen bat egin eta gero, magia ikuskizun bat eta musika emanaldi eta exposaketa komunal bat egin ziren. Hogeitamar pertsona inguru agertu ziren irekiera egunean.
Arratsaldero zabalik
Ordutegiaren aldetik, Hauspoa astean zehar irekita egongo da 17:30etatik 21:00 arte eta larunbatetan goizez. Momentuz, bazkide eta partaideek ordaintzen dituzten kuotei esker kudeatuko ditu proiektuak bere behar ekonomikoak, baina herriko jendearen aldetik parte-hartze handiagoa espero dute kolektiboaren kideek.
Hauspoak ibilbide luze bat bete du bere helburuak gauzatu baino lehen. Duela urte pare bat Sasien Sehaska kolektiboak ahalegin ezberdinak egin zituen lokal bat irekitzeko helburuarekin. Garai horretan pertsona gutxi zeuden lanean eta ezer ezean gelditu ziren saiakera guztiak. La Kuadrako hustearen ondorioz jende gehiago hurbildu zen eta ekimenaren izena eta osaketa aldatu zen. Orduan Hauspoa bataiatu zuten ideia eta kalean hasi ziren ekintza kulturalak burutzen. Azkenean, bere ahaleginak beste zentzu batean bideratu zituzten, lokal honen irekiera lortu arte.