Larunbatean (otsailak 4) estreinatuko da The Key (Giltza) filma laburra Bilboko Guggenheim museoko auditoriumean, 18:30etan. Ken Zazpi taldearen “Ilargia” abestian oinarritutako koreografia bat du ardatz pelikulak. Lucia Lacarra ballet dantzari ospetsua da protagonista, baina beste bi dantzari agertzen dira berarekin filmean: María Iturbe Rey eta Mikel Alexander Etxebarria Lafuente. 12 eta 14 urte dituzte hurrenez hurren, eta biak ala biak dira Amurrioko Udal Dantza Eskolako ikasleak.
“Magiaz betatako maitasun istorioa”
Eskolaren zuzendaria den Jon Ugarrizak sortutako proiektua da The key. Bere hitzetan, magiaz betetako maitasun istorio bat kontatzen du pelikulak. Ugarrizak azpimarratu du eskolako bi dantzariek “oso paper berezia” dutela filmean, eta gaineratu du biak filmean agertzeak aukerak ireki ahal dizkiela eskolako gainontzeko ikasleei. Gaur egun 75 gazte daude eskola horretan dantza akademikoa ikasten.
Oscar Andres argazkilaria arduratu da filma zuzentzeaz. Berak eginiko castingean hautatu zituzten Iturbe Rey eta Alexander Etxebarria. Bilboko hainbat txokotan egin dute grabaketa.
Filmaren trailerra: