Josune Irabien alkateak azaldu duenez, paseatzeko zirkuituak garbituko dituzte datozen asteetan. "Osasun bideez gain, naturbideak hobeto seinalizatuko ditugu". Izan ere, duela 15 urte egin zituzten, eta zeharrormekin atondu ziren: "Batetik bestera distantzia handia dago, eta hainbat bidegurutzetan zailtasunak daude bidea identifikatzeko". Hori dela eta, naturbideetako seinaleak berrituko dituzte, "inguruarekin bat". Egurrezko materiala erabiliko dute horretarako. Eskuorriak ere argitaratuko dituzte: "Natur-gune oso interesgarriak dira, herritik gertu daudenak, bi orduren bueltan osa litezke zirkuituak". Izarza gunea ere hobetuko dute. "Espezie autoktono askodun espazioa da, horregatik da garrantzitsua ondo mantentzea", adierazi du Irabienek.
Nerbioiko behatokia
Bestalde, Nerbioi ibaiaren jaiotzako behatokiaren berri izateko Arabako eta Gaztela-Leoiko Batzar Nagusiekin jarri da harremanetan Amurrioko Udala. "Prentsan ikusitakoaren informazioa jasotzeko asmoz jarri gara kontaktuan, baina erantzun bakarra jaso dugu, Arabakoa, informazio gehiago jaso ez dutela esaten", azaldu du alkateak. Babestutako eremua izanik, Irabienek aurreratu du beharrezkoa dela edozein interbentzio egiteko administrazioen eta udalen baimena.