Bertsolariei plaza berriak eskaintzea eta herritarrak bertsozaletzea. Horiek dira Arabako Bertsolari Elkarteak "Altxa kopla hori!" dinamikari egotzi dizkion helburuak. Emanaldi bereziak dira, musika doinuekin inprobisatu beharko baitute bertsolariek. Ez da hori izango, ordea, berezitasun bakarra: koplaka kantatu beharko dute. Hala, "Guantanamera", "Katamalo", "Johana give me hope", "John zaharra" edo Mikel Laboaren "Oihanak pagoal blai" abesti ezagunei hitza jarri beharko diete artistek. Emanaldian musikariek ere hartuko dute parte.
Eskualdeko bigarren saioa
Maiatzaren 26an izan zen Artziniegako saioa, eta makina bat entzule bildu zen frontoiko gradetan. Amurrioren txanda izango da oraingoan, eta udaletxe aldameneko plaza aukeratu dute bertsotarako. Aintzane Irazusta gai-jartzailearen esanetara ariko dira Xabi Igoa aramaioarra, Jon Ruiz de Pinedo zalduondoarra, Aroa Arrizubieta gasteiztarra eta Serapio Lopez baranbioarra. 19:30ean hasiko da bertso-saioa, udako solstizioa izaki, ekitaldi ugari egongo baitira ondoren.