Amurrioko Udalak jakinarazi du ibilgailuen abiadura kontrolatzeko radarra erosi duela eta hilabete honetan hasiko dela erabiltzen ondorengo auzo eta kaleetan: Landaburun, Landakon, Aldain, Aldaiturriagan eta Bañuetaibarren.
Ekainaren 26tik uztailaren 2ra arte iraungo du abiadura kontrolatzeko ekimenak, bat eginez Eusko Jaurlaritzak, Trafikoko Zuzendaritza Nagusiak (DGT) eta Europar Batasunak antolatzen dituzten beste kanpainekin.
Josune Irabien alkateak azaldu du auzo batzarretan adierazitako kexei erantzuna emateko abiatu dutela egitasmoa: “Ibilgailuak azkarregi igarotzen direla adierazi dute herritarrek Alkinar, San Jose, Goikolarra, Bañuetaibar, Landako eta San Roke auzoetako azken hiru urtetako asanbladetan”.
Guk Bairen eskaerak
Radarraren inguruko mozioa aurkeztu du Guk Baik, hilabete honetako udalbatzan eztabaidatzeko. Bi gauza eskatu ditu udal-talde politikoak: radarrarekin biltzen den dirua zebrabideen ikusgarritasuna hobetzeko eta trafikoaren segurtasuna bermatzeko baliatzea eta hitzaldi irekia antolatzea, herritarrak informatu eta kontzientziatzeko.