Bi proiektu aurkeztu ditu Amurrioko Udalak Foru Planera, Aldundiak diruz lagundu ditzan. Hornidura sarea berritzean datza egitasmoetako bat. “Zuntz-zementuzko eta burdinurtuzko hodi guztiak eta polietilenozko hodi tarte guztiak kenduko dira, etengabe gertatzen direlako matxurak”, zehaztu dute udaletik. Gaineratu dutenez, horretarako ondorengo kaleetan egingo dira obrak: Bañuetaibar, Landako, Ugartebetxi-Refor, Aiara-Aldai, Aresketa, Aresketamendiko aldapa, Sagartoki, Boriñaur plaza, Sagarribai eta Lejarzoko depositurako aldapa. Azken kale horretako obrara bideratuko da inbertsio handiena, 220.000 eurokoa. Aurrekontu osoa 908.594,23 eurokoa izango da.
Erabilera anitzeko jokalekua
Foru planera aurkeztuko den bigarren proiektua Refor industriagunean egiteko izango da. Zelai sintetikozko jolaslekua eraikitzea da asmoa, futbol zein errugbi partidak jokatzeko balioko lukeena.
Udaletik azaldu dute gaur egun dauden azpiegiturek “egiturazko arazo larriak” dituztela: “zelaiek ez dituzte betetzen futboleko eta errugbiko federazioek eskatzen dituzten gutxieneko neurriak, drainatzeko arazoak daude, argiztapena ez da nahikoa, perimetroko itxiturak hondatuta daude eta kirol ekipamenduak higatuta daude, besteak beste”.
1.071.925,08 euro bideratuko dira obra horretara.