Gaur sinatu dute akordioa Arcos de Quejana jatetxean Alfonso Fernandez de Troconiz Deportivo Alaveseko presidenteak eta Miguel Angel Jauregi Amurrio Klubeko arduradun nagusiak. Eskualdeko taldeak bukatutzat eman du, momentuz, 25 urteko elkarlana Athletic Clubarekin.
Amurrioko presidenteak adierazi du urrats handia izan dela, eta Alavasekoak nabarmendu du oinarrizko futbolerako ekarpen inportantea izango dela Araban errotutako kluba txertatzea. Izan ere, Deportivo Alavesen asmoa da herrialdeko talde guztiak erakartzea proiektura. Zentzu horretan, oso garrantzitsutzat jo du Aiarako talde batekin hitzarmena gauzatzea.
Athleticen itzala
Prentsaurrekoan agertutakoek galdetu dute nolakoa izango den harremana jarraitzaileekin, jakinda eskualdeko jende gehiena athleticzalea dela.
Jauregik azaldu du kirol arloan dela bereziki interesgarria akordioa: "Nik badakit Alavesek maila handiko jokalariak utziko dizkigula, eta oinarrizko futbolean lagunduko gaituela, ekarpen ekonomikoa, garrantzitsua bada ere, niretzat bigarren mailakoa da".
Alfonso Fernandez de Troconizek badaki Athleticen presentzia handia dela Aiaraldean, baina bere zuzendaritzaren helburua da erreferentzia lortzea Araban. Gauzak horrela, hitzarmenak 4 ildo dauzka: trebakuntza, metodologia, kirola eta ekonomia.
LAGUN AGURGARRIA:
Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
Faktoria izan, egin zaitez bazkide.
Aiaraldea Hedabideko lantaldea.
Izan bazkide