Juanjo Hidalgok balorazio oso positiboa egin du aurtengo indusketa arkeologikoaren kanpainari buruz Elexazarren. Adituak azaldu du ekitaldia ez zela ondo hasi, izan ere, bi leku induskatu zituzten eta ez zuten ezer topatu. Hala ere, gune berria ikertzeari ekin zioten eta ezusteko atsegina hartu du Hidalgok.
Auniako kideak argitu du 22 metroko horma aurkitu dutela eta horrek atea ireki diola hipotesi berria egiteko. Juanjo Hidalgoren ustez, Elexazarren Erromatar Erresumarako ekoizpen zentroa zegoen. "Askotan interpretatu dute horrelako herrixken eginkizuna militarra zela, baina nire aburuz horrek ez dauka zentzurik, III. mendean Pax Romana deiturikoa gailendu baitzen", argudiatu du Hidalgok.
Abeltzaintza
Historialariaren susmoa da horma luze hori zela ukuilua eta bertan erresumarako abereak hazten zituztela. Hidalgoren ustetan, hipotesi horrek zentzua emango lioke gainerako eraikinei: "1. eraikina etxebizitza zen, 2. tailerra eta 3. ez da burdinola, ez baitago horren arrastorik edo zirtzilkeriarik. Hortaz, ekoizpena animaliena izan zitekeen".
Hidalgok gogoratu du antzeko antolakuntza zegoela Alorian, baina Elexazar toki askoz altuagoan dago kokaturik.
Kanpaina polita
Adituak nabarmendu du oso pozik dagoela, ez bakarrik indusketen emaitzengatik, baita jendearen erantzunarekin ere. Berez, 20 lagunek baino gehiagok lan egin dute indusketetan.
"Leku ugariko pertsonak bertaratu dira; Morgakoak, Bilbokoak, Durangokoak, Orozkokoak, Laudiokoak, Gasteizkoak, Urduñakoak edo Leioakoak" erantsi du. Gainera, adin anitzeko parte-hartzaileak izan dira, batzuk oso gazteak eta besteren bat erretiratuta, esaterako.
18 egunez jardun dira Elexazarren eta Juanjo Hidalgok ziurtatu du partaidetzak asko bizitu duela ekitaldia.