Milaka arrain agertu dira hilik Nerbioi Ibaian, Amurrion

Erredakzioa 2017ko ira. 15a, 23:06
Deskargatu Info Ahotsak :

Refor inguruan agertu dira arrainak eta herrigunera heltzen dira. Hala ere, gorago ere gehiago egon daitezke. 112 emergentzia zerbitzuak gaur jaso du 09:00etan gertatutakoaren berri eta protokoloa abiatu du. URA Agentziak atzotik zekien. Nerbioi Bizirik taldeak elkarretaratzea egingo du igandean 13:00etan Amurrioko Juan Urrutia plazan.

Milaka arrain agertu dira hilik Nerbioi Ibaian, Amurrioko Refor industriagunearen inguruetatik herrigunera daude ikusgai. 112 larrialdi zerbitzuak protokoloa abiatu du, gaur goizean horren berri izan eta gero. Arabako Foru Aldundia eta URA Agentzia ere jakinaren gainean daude.

Berez, URA Agentziak laginak hartu ditu, bere susmoa baita isurketa gertatu dela. Hala ere, ur laginak analizatu behar ditu jakiteko zerk eragin duen triskantza eta zeintzuk diren ondorioak. Edonola ere, eragina larria izan dela ematen du.

Elkarretaratzea igandean
Nerbioi Bizirik plataformako boluntarioak egon dira Reforren eta euren asmoa da industriagunera jotzea ikusteko non hasten den arrain hilen arrastoa.

Horrez gain, plataformak oharra zabaldu du salatzeko ez dela lehenengo isurketa Nerbioian eta informazio gehiago nahi dutela erakunde publikoen aldetik. Hori aldarrikatzeko elkarretaratzea deitu du taldeak iganderako. 13:00etan egingo dute, Amurrioko Juan Urrutia plazan, Artzain Eguna egingo dela probestuta.

Indar politkoen salaketa
Amurrioko EH Bilduk adierazi du Nerbioi ibaira egindako azken isurketa oso kezkagarria dela. Amurrioko zinegotzia den Juanjo Yarrituren hitzetan: "Momentuz jaso dugun informazioaren arabera ehundaka izan dira hilik agertu diren arrainak eta gertaera honen erruduna zein izan den argitzea eskatzen diogu Amurrioko Udalari eta Eusko Jaurlaritzari". Neurri eraginkorrak hartzearen beharra azpimarratu du koalizioak, horrelako gertaerak berriro errepikatu ez daitezen.

Aiaraldeko PPk ere oharra zabaldu du gaiaren inguruan eta azpimarratu du URA dela ibaiaren zaintza, arau-hausleekiko zorroztasuna eta eta nekazariekin elkarlana handitu behar dituena.

Josune Irabien alkateak, aldiz, bere twitter kontua baliatu du gertatutakoa salatzeko:

Alkateak adierazi du: "enpresa arduraduna lokalizatu bezain laster, dagokion zehapena eta, hala badagokio, neurri zuzentzaileak ezarriko zaizkio, berriro gerta ez dadin, bereziki orain, ibaiaren bioaniztasuna berreskuratzen saiatzen ari baikara”.

Ez da Nerbioiko fauna hilik agertzen den lehenego aldia. Uztailean ere ehunka arrainen gorpuak agertu ziren ur-azalean, Laudio eta Areta artean:

 

Ingurumena Amurrio

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide