Gaur egin da Amurrioko iraileko Udal Osoko Bilkura. Alfredo Remirezen aurkako espetxeratze agindua salatzeko mozioa eztabaidatu da bertan, EAJren, EH Bilduren, Orain Amurrioren eta Amurrio Guk Bairen botoekin onartu dena. PSE eta PPk aurka bozkatu dute. “Mozioa ez dator bat errealitatearekin”, argudiatu du Montse Canivek. Alderdi Popularreko zinegotziaren arabera, Remirez “bererrorlea” da eta bere erantzunkizuna da delituak egiteagatik dagozkion zigorrak jasotzea.
PSE-EEko ordezkariak, bere aldetik, adierazi du “botere judizialean injerentzia politiko bat” egiten saiatzea iruditzen zaiola mozioa. “Epaileen lanaren independentzian sinesten dugu”.
Gainontzeko taldeek elkartasuna adierazi diote Remirezi eta amurrioarra urtebete espetxeratzearen erabakia salatu dute.
Beste gaiak
Remirezena ez da izan udalbatzan landu den gai bakarra. Beste hainbat mozio eztabaidatu dira. Kataluniako erreferendumari buruzkoa aurkeztu da, besteak beste. Arestian aipatutako jarrera berdinak errepikatu dira: PSE eta PP izan dira aurka bozkatu duten bakarrak, gainontzeko taldeek alde egin baitute.
Bañueta kiroldegia ere izan dute hizpide plenoan, bertako zerbitzuen kudeaketa publiko zuzena aztertzea eskatu baitute EH Bilduk, Orain Amurriok eta Guk Baik. Mozioak ez du aurrera egin, gainontzeko taldeen aurkako botoak jaso baititu.
Gainontzeko puntuetan askoz adostasun handiagoa egon da taldeen artean. ASASAM elkarteak aurkeztutako mozioan ia guztiek bozkatu dute alde -PSE abstenitu egin da-.
Aho batez onartu dute Landakoko Osasun Zentroa zegoen eraikinarentzako erabilera berria proposatzen zuen puntua. Hala ere, eztabaida egon da taldeen artean, desadostasunak egon baitira proposamen hori osatzeko eman den prozesuaren inguruan.
Gainontzeko puntu guztiak ere onartu dira, gehienak aho batez.
Ikusi Udal Osoko Bilkura osorik hemen: