Berritu dute Amurrioko merkatari txiki eta ertainen elkartearen (APYMCA) merkataritza-txartela. Amurrioko merkataritza sustatzeko sortu zuten “Amurrio Txartela” bezala ezagutzen den tresna. Orain, erabilera berriak emango dizkiote txartelari merkataritzaz haragoko gestioak erraztuz.
Merkataritza jarduera herriko BPGaren %11 dela azpimarratu dute APYMCA-ko kideek. Kontsumo lokala indartu eta Amurrioko komertzioen garrantzia jendarteratzeko asmoz sortu zuten txartela, eta funtzionalitate berriak gehitu dizkiote udalaren eta Caja Ruralen laguntzarekin.
Udal liburutegia eta kiroldegia
Aurrerantzean hainbat udal zerbitzuren kudeaketarako baliagarria izango da “Amurrio Txartela”. Udal liburutegian eta, epe laburrean, kiroldegian egongo da erabilgarri. Udalarekin erlazionatutako eta helbideratu gabeko ordainketak ere gauzatu ahalko dira txartel hori erabilita.
Tresna berrituari ongi etorria egiteko 5, 10 eta 50 euroko hobariak zozketatuko dira azaroaren bigarren erdialdetik aurrera. Abenduan, aldiz, aisialdi-sortak zozketatuko dira, “Ongizateko 3 egun” bezala izendatu dituztenak. Halaber, erabiltzaileek aukera izango dute hurrengo erosketetarako deskontuak pilatzen jarraitzeko.
