Amurrioko Abel Fernadez "Spiderabel" korrikalaria Montes Solidarios ekimeneko kidea da. Elkarteak dibertsitate funtzionala duten pertsonei zuzendutako mendi jarduerak antolatzen ditu, mugarik existitzen ez dela erakustea helburu.
Abenduaren 10ean Malagan izango da Spiderabel, bertan, bere 59. maratoian parte hartuko du. Ez du, ordea, lasterketa bakarrik egingo, Rafa Ledesmarekin batera egingo du korrika. Ledesma itsua da eta elkarri lotutako lokarri baten bidez arituko dira lasterka.
Ez da bi kirolariak elkarrekin arituko diren lehen aldia, Amurrio Trail Lasterketan ere elkarlanean aritu baitira:
Elkartasun ekimen hori ingurukoen artean zabaltzeko apustu jolasa abiatu du Abel Fernandezek. Malagako maratoia osatzeko denboraren gainean egin beharko da apustua. Apustu bakoitzak 1,5€ balioko du eta eskualdeko hainbat tabernatan egin ahalko da: Laudioko Azokan; Urduñako Mugalde eta Sortetxen eta Amurrioko Txokogorri, Cola de Gallo, Toki Eder, Guk, Txotis eta Arkune tabernetan eta Ayala ostatuan.
Babiora igoera
Malagako maratoiaz gain beste elkartasun ekimen bat prestatuko du Abel Fernandezek "Montes Solidarios" elkartearekin batera abenduaren 24erako. Ekimen hau urtero antolatzen den Babiora igotzeko txangoa izango da. Bertan, dibertsitate funtzionala duten hiru lagun lagunduko dituzte mendiko tontorrera. Ibilaldia 10:00etan abiatuko da Amurrioko Juan de Urrutia plazatik. Babion daudela argazki herrikoia aterako dute Olentzerorekin batera eta txokolatada prestatuko dute gero Juan Urrutia plazan, martxa herrira itzultzen denerako.
Iaz egin zuten ekimena lehenbiziko aldiz: