San Anton Jaiak bi lekutan ospatuko dira asteburuan; Baranbion eta Amurrioko herrigunean.
Pospoloaren enkantea
Baranbiogoi auzoan bihar hasiko dira ospakizunak 12:00etan mezarekin. Hori bai, egitarau ia guztia larunbatean gauzatuko dute hurrengo ekintzekin:
- 18:00etan igel toka txapelketa umeentzat
- 19:00etan igel toka txapelketa helduentzat
- 20:00etan herri afaria
- 21:00etan enkantea
- 23:00etan erromeria
- 04:00etan txintxorta jana
Ikus daitekeen moduan, San Anton baselizan apurka-apurka joango dira giroa berotzen eta unerik bereziena enkantearekin helduko da. Ohitura hori 1738. urtetik jarraitzen dute eta tenplua bera mantentzera bideratzen da lortutako dirua.
Enkantearen berezitasuna da herritarrek eramaten dituzten otarrak lortzeko pospoloa pizten dela eta eskaintzak egiteko aukera dagoela itzali arte. Aurkezle batek zuzentzen du dena eta eskaintza egiten duen jende orok ardo edalontzia jasotzen du.
Pospoloa amatatu ahala beste bat pizten da eta azkenengo eskaintza egin eta berririk gabe 3 pospolo erretzen badira, hori da otarra lortzen duen eskaintza.
Elkartasun azoka
Ordea, Amurrioko herrigunean igandean izango da ospakizuna 10:00ak aldera. Urtero bezala, -hau da X. edizioa- San Anton plazan elkartasun azoka egingo dute 100 ekoizleren partaidetzarekin. 11:30ean mezari ekingo diote eta 13:00etan enkanteari.
Aurten eskuratuko duten dirua Gazte Alaiak taldearentzat izango da. Iaz 2.500 euro jaso zituzten Caritas eta Laguntza taldeen jarduera finantzatzeko.
Txerria ez da enkantean sartuko
Orain arte, txerria zen enkantearen protagonista, aldiz, aurten zozketatuko dute. Izan ere, jende guztiak ez dauka 100 kilo haragi etxean gordetzeko aukerarik, eta, hori dela medio, gero eta etekin gutxiago ateratzen zioten, lagun gutxik egiten baitzuten eskaintza.
Bestalde, txerrikumeak eta arkumeak bazkaltzeko parada emango dute eta horretarako 75 edo 90 euro ordaindu beharko dute interesdunek, baina aurretik izena eman behar da horretarako 664 08 18 83 telefono zenbakian.