Atzo ospatu zen Otsaileko Amurrioko Udal Osoko Bilkura. Hainbat jorratu ziren bertan. Alderdi Popularrak txakurren gorozkien gaineko ebazpenak hartzeko eskatu zuen eta proposamenak talde guztien babesa jaso zuen. Guk Bai alderdiak aurkeztutako adinekoentzako etxebizitza kooperatiboen gaineko mozioak, ordea, ez zuen aurrera egiterik izan, alderdi ugarik gaia komisio batean jorratzeko beharra azpimarratu zutelako.
EHBildu eta EAJren arteko tentsioa
Julen Ibarrola gaztearen espetxeratze egoera salatzeko testu bateratua aurkeztu zuten EHBilduk, Orain Amurriok eta Guk Bai alderdiek. Testuan, gazte amurrioarraren espetxeratzea salatu eta hainbat erakunderi, Entzutegi Nazionalari tartean, interpelazio zuzena egiteko eskaera egiten zitzaion Amurrioko Udalari.
Gai-ordeneko puntu horrek tentsioa eragin zuen EHBilduren eta EAJren artean. EHBilduk udalaren negoziaziorako borondate eza salatu zuen 2012an Landazuri eraikina okupatzearen ondorioz zabaldu zen prozesu judizialean. Izan ere, epaiketa horren sententzian oinarritu da Entzutegi Nazionala Ibarrola espetxeratzeko, berrerortzea argudiatuz. Josune Irabienek koalizio abertzalearen akusazioak gaitzetsi eta EHBilduko zinegotziak seinalatu zituen aho batez onartua izan zitekeen mozio bat guztien adostasunarekin ez onartzearen erantzule gisa. EAJ abstenitu egin zen bozketan, baina mozioa aurrera atera zen hala ere.
Greba feminista eztabaidagai
Orain Amurriok urgentziazko mozioa aurkeztu zuen martxoak 8ko greba feministari babesa adierazteko. Mozioa eztabaidatzeko unean EAJk testu alternatiboa aurkeztu zuen greba deialdiaren helburuekin bat etorri arren formak konpartitzen ez dituztela argudiatuz. Eztabaidak luze jo zuen arren bozketa bertan behera geratu zen.