Gaur irekiko da Amurrio Trail Lasterketan izena emateko epea, arratsaldeko seietan. Ekainaren 17an izango da zita. Juan Urrutia plazatik abiatuko dira lasterkariak. Antolatzaileek aurreratu dutenez, hiru ibilbide egongo dira.
31 kilometrokoak 1.700 metroko desnibel positiboa izango du eta proba puntugarria izango da Arabako Mendi Lasterketen Koparako zein Euskal Mendizale Federazioaren rankingerako.
22 kilometrokoak 1.050 desnibel positiboa izango du eta Aldama, Peña Ñegra edota Kuxkumenditik igaroko da, besteak beste.
Hirugarren ibilbideak 12 kilometroko luzera izango du eta Kuxkumendi eta Abiagatik igaroko da. Korrikalariek 550 metroko desnibel positiboari egin beharko diote aurre.
Hemen eman daiteke izena ibilbide luzean, hemen ertainean eta hemen, aldiz, laburrean.
Norgehiagokaren laugarren edizioa izango da aurtengoa. Antolatzaileen esanetan, “apurka-apurka” hazten joan da ekimena. “Iaz izan genuen parte hartzaile kopuru handiena, 400 kirolari inguru”, azaldu du Amurrio Trail Taldeko presidentea den Imanol Llanok. “Ezagunak bihurtu gara dagoeneko mendi lasterketen munduan, bagoaz gure tokia egiten”. Llanok aurreratu du “oso ibilbide polita” osatu dutela eta nabarmendu du “giro aparta” sortzen dela helmugan. “Sariak eta hornidura-postuak tokiko produktuekin osatzen ditugu, gainera”