AmurriokoEKIN egitasmoaren bigarren edizioa abiatu du Amurrioko Udalak. 430.000 euro bideratuko dituzte aurrekontu parte-hartzaileak sustatzea helburu duen egitasmo horretara. Prozesu parte-hartzailea abiatuko du tokiko erakundeak, auzokideek erabaki dezaten zertan inbertitu diru-kopuru hori. Aurrekontuaren erdia -215.000 euro- 2019an erabili beharko da eta 2020. urtean, aldiz, beste erdia.
Gaur ireki da herritarren inbertsio-proposamenak jasotzeko epea. Auzokide bakoitzak nahibeste ideia aurkeztu ditzake, ondorengo baldintzak beteta betiere: Amurrion erroldatua egotea eta 16 urte izatea gutxienez. Helarazten diren proposamenak inbertsioak izan behar dira eta udalaren eskumenen barruan egon behar dira. Hori dela eta, prozesutik kanpo geratuko dira Batzar Administratiboetan gauzatzeko inbertsioak.
Ideiak helarazteko hainbat modu daude: Postontziak -Udaletxean, Kiroldegian eta Kultura Etxean-, Internet bidez -www.amurriokoekin.eus- edo posta elektroniko bidez -partehartzea@amurrio.eus-. Horrez gain, karpak jarriko dituzte zenbait auzotan eta San Anton plazan merkatu egun batzuetan, auzokideen ideiak zuzenean jasotzeko.
Bi inbertsio mota
Udalak bitan banatuko ditu inbertsio-proposamenak: 5.000 euro baino gutxiagoko kostua dutenak alde batetik eta diru gehiago eskatzen dutenak bestetik. Urte bakoitzean baliatuko diren 215.000 euroetatik 200.000 baliatuko dira 5.000 euro baino gehiagoko inbertsioak gauzatzera eta 15.000, aldiz, txikiagoetara.
Lau fase
Udaletik jakinarazi dute prozesuak lau fase izango dituela. Ideiak aurkezteko epea amaituta ekingo diote bigarren pausoari: jasotako proposamenen bideragarritasuna aztertzea. Lehentasunen arabera sailkatuko dituzte gero, eta bozketa herrikoia egingo dute amaitzeko.
Auzokidez osatutako talde-motor bat sortu dute prozesu osoaren jarraipena egiteko.