09:00etan Juan de Urrutia plazatik abiatuko dira Amurrio Trail taldeko kideak eta nahi duenak 09:30ean San Roken batzeko aukera izango du, Tubos Reunidos enpresako putzuan, alegia. 11:30ean jarriko dute postontzia eta trikitilari talde baten animazioa ez ezik, hamaiketakoa ere egongo da. Horren ostean jaitsiko dira.
Arrola mendilerroan kokatzen den 605 metroko gaina da Inordui mendia, Amurrio eta Luiaondo artean dagoena, hain zuzen. Amurrio Trail Taldeak hilabeteak daramatza lanean bertan buzoia jartzeko helburuarekin.
Arabako Mendi Federazioarekin elkarlanean buzoia jartzeko baimen guztiak bete ostean, tontorra garbitzen igaro dituzte azken asteak. Behin ingurua garbituta, maiatzeko azken asteburuan daukate postontzia instalatzeko asmoa. Horretarako mendi ibilaldia antolatuko dute Amurrioko Juan de Urrutia Plazatik eta tontorrean hamaiketakoa eskainiko dute.
Mendiaren garbiketaz gain, buzoia bera diseinatzeko lanetan ere badabiltza Amurrio Trail Taldeko kirolariak eta hurrengo egunetan aurkeztuko dute diseinua. "Ilusio handia egiten digun proiektua da hau" azaldu dute trail taldeko kideek, "hemendik aurrera betirako geratuko baita buzoia tontorrean".