Lankidetza hitzarmena sinatu dute Amurrioko Udalak eta Sartu-Araba gizarteratze elkarteak. Herriko 14 langabetu kontratatuko dituzte akordio horren bidez, sei hilabeterako. “Pertsona horiek prestakuntza teoriko-praktikoa, orientazioa eta gizarteratzerako laguntza jasoko dute”, azaldu du udalak. Erabilera publikoko espazio naturalen eta hirikoen mantentze-lanak gauzatzea izango da kontratatutako langabeen zeregina.
Iragan ostiralean ireki zuten programan izena emateko epea, eta ekainaren 14ra arte egongo da zabalik. Interesdunek hainbat baldintza bete beharko dituzte: Amurrion erroldatua egon izana gutxienez lau urtez eta Lanbiden langabetu gisa izena emanda izatea -18 hilabetez gutxienez azken bi urteetan-. Esperientzia profesionala izatea ere eskatuko da, “eraikuntza, industria, garbiketa edo ingurumen sektoreetan”.
Lanbide.net webgunean plazaratu dute lan-eskaintza, “Erabilera publikoko espazio naturalen eta hirikoen mantentze-lanetarako laguntzailea” izenarekin. Bertan sartuta eman ahalko da izena. Ondoren abiatuko dute aukeraketa prozesua.