2-1 irabazi zuen Amurriok Laudio Arabako herrien arteko txapelketan. Arabako Pilota Federazioaren esanetan, senior mailako partida izan zen erabakiorra, "kadete eta kimuetako orekarekin hautsi zuen".
Amurrioko Gerrero-Arregi bikoteak 22-20 garaitu zuen Pagazaurtundua anaien taldea. Alabaina, partida lehiatua izan zen, 19-20 irabazten egon baitziren laudioarrak. "Gerrerok eta Arregik larri eta estu, baina partida dominatzea lortu zuten", adierazi dute federaziotik. Jon eta Asier Pagazaurtunduak, hala ere, ondo eutsi zioten norgehiagokari, aukerak aukera eta akatsak akats.
Lehia estua
Lehia estua izan zen, edozelan ere; azken partidan erabaki baitzen txapelduna. Aurrez, garaipen bana eskuratua zuten Amurriok eta Laudiok. Gorriz zelairatu ziren amurrioarrak. Larrazabal eta Jimenezek ordezkatu zuten Amurrio lehen partidan, eta 22-11 irabazi zituzten Laudioko Alonso eta Amondo. Kimuetan, berriz, Yuste-Barbara bikote laudioarrak 22-3 irabazi zituen Álava-Gonzalez amurrioarrak. "Iker Yusteren mailu botereak ageriko desberdintasuna markatu zuen bere adinekoen artean", azpimarratu dute federaziotik.
Araba Euskaraz festa baliatuta, emakumezkoen pala partidak abiatu zuen jaialdia. Gasteizko Olatz Zulaika eta Joane Maizek Ane Aldama eta Ane Murga izan zituzten aurkari, eta 30-17 gailendu ziren hiritarrak.