Ikasturte berria iritsi aurretik jarri du dantzan ingurua Aiara Dantza Taldeak. Umeen eta helduen urte osoko kuotak aurkeztu dituzte dagoeneko, baita izena emateko epea ere. Entseguak Reforreko gimnasioan mantenduko dituzte, "baina gehienez 20 pertsona egongo dira talde bakoitzean". Hala adierazi diote arduradunek Aiaraldea hedabideari. Dena den, "izena emateko epearen ostean plazak libre geratzekotan, epetik kanpo izena emateko aukera egon daiteke", zehaztu dute.
Familia unitateka ezarri dute ikastaroen zenbatekoa. Lehen kideak 50 euroko kuota ordaindu beharko du, bi senide izatekotan 90 eurokoa izango da prezioa, eta familia bereko hiru lagun egotekotan 120 eurokoa. Izena ematean eskura egin beharko da ekarpen ekonomikoa. "Beste urte batzuetako esperientziaren ondorioz, behin izena emanda ez da kuota itzuliko. Soilik emango da bueltan erantzukina dantza taldearena denean; adibidez, azken orduko ordutegi aldaketaren kasuan".
Hiru talde
Hiru talde aurreikusi ditu 2018/2019 ikasturterako Aiara Dantza Taldeak. "Umeak", 5-16 urte bitartekoak, asteazken eta ostiraletan elkartuko dira 17:00etatik 18:00etara. "Helduak" -16 urtetik gorakoak-, berriz, asteazkenero bilduko dira 18:00etatik 19:00etara. "Talde horretan, erromerietako dantzak ikasteaz gain, plaza dantzak ikasiko dituzte; eta Aiara Dantza Taldearen dantzaldietan parte hartzeko aukera izango dute", erantsi dute.
Dantza plaza
Dantza plaza saioak ere eskainiko dituzte 30 euroren truke: "Talde honetan erromerietako dantzak ikasiko dira. Entseguak larunbat goizetan izango dira, 13:30ean". 16 urtetik gorakoei zuzenduta dago tailerra.
Taldearekin harremanetan jartzeko posta elektronikoa (aiaradantzataldea@gmail.com) eta telefono zenbakia (688662554) jarri dituzte eskura.