aiaraldea.eus

Goizale: 50 urtez Gorobelen mendizaleen aterpe

Erabiltzailearen aurpegia Aimar Gutierrez   Kirola  Amurrio

Urriaren 6 eta 7an hainbat ekintza egingo dituzte Mendiko Lagunak taldeko kideek Goizalde aterpeak 50 urte bete dituela ospatzeko. 1968. urtean inauguratu zuten eta orduz geroztik makina bat mendizaleren babesleku izan da. Ez da, baina, funtzio hori betetzen duen eskualdeko eraikin bakarra. Beste hainbat aterpe daude Aiaraldeko mendietan barreiaturik, 60-80. hamarkaden artean eraikitakoak gehienak.

Goizale: 50 urtez Gorobelen mendizaleen aterpe
1968. urtean inauguratu zuten Goizalde aterpea. / Mendiko Lagunak | Ikusi handiago | Argazki originala

Gorobelgo mendilerroan, POnata hain zuzen, Iturrigorri menditik gertu dagoen pagadian aurkitzen da Goizalde aterpea. Mendiko Lagunak talde amurrioarrak 50 urte darama eraikina kudeatzen.

1967an hasi ziren Amurrioko mendizaleak aterpea eraikitzen eta 1968ko urriaren lehenengo asteburuan inauguratu zuten. 18 lagunentzako espazioa du, komun, sukalde eta dutxa batekin dago ekipaturik. Gainera, bi lagunentzako toki librea ere badauka, Gorobelen zehar dabilen edozein mendizalerentzako eskuragarri.

Mendiko Lagunek bi egunetako egitaraua antolatu dute Goizaleren mende erdiko ibilbidea ospatzeko. Urriaren 6an eta 7an egingo dituzte ospakizunak. Urriaren 6an, larunbata, 19:00etan abiatuko dira Amurriotik aterpera.Afaltzeko eta kontzertu batez gozatzeko aukera egongo da bertan. Igandean, Lendoñotik  martxa bat abituko da, gaua aterpean pasa duten mendizaleekin batzeko. Eguerdian, 50. urteurreneko pregoia irakurtzearekin batera, talde argazkia atera eta herri bazkaria egingo dute, 3 euroren truke. Igela txapelketak itxiko du egitaraua.

Mendizaleen babesleku
Aiaraldeko mendietan badira mendizaleentzako aterpe gehiago. Laudioko Goikogane Mendi Taldeak, adibidez, Gorbeiako Parke Naturalean dagoen Austegiarmin mendi magaleko aterpe itxia kudeatzen du. Eraikin hori 1973ko uztailaren 1ean inauguratu zen. Bi solairuko egitura da eta 32 lagunentzako espazioa eskaintzen du bi gelatan banatuta.

Gorobelera itzuliz, Tologorritik gertu, Ponata inguruko pagadian, Larruazabaleko Administrazio Batzarrak aterpe bat kudeatzen zuen, egun artzain borda bezala erabiltzen dena. Eskutxi mendiaren  magalean, San Bitores baselizatik gertu, Kobatako aterpea dago. 1966an eraiki zen eta “El Nido” izenarekin bataiatu zuten. “Salbada Aterpea” izendatu zuten 1988an eta azkenik “Kobata Aterpea” deitu zuten, hamar urte geroago, kudeaketa Aiarako Udalaren esku geratu zenean.

Kobatako babeslekuak sukaldea, dutxa eta bi logela ditu mendizaleentzako erabilgarri. Horrez gain, badu baita ere edozein larrialdi unetan erabili daitekeen aterpe libre bat, bi lagunentzako espazioarekin.

Aterpe libre gehiago ere badira Gorobel inguruan, urteko egun guztietan zabalik mantentzen direnak beharra duen edonorrentzat. Horietako bat da Txolopeko aterpe irekia, “Corralejo” deituriko artzain borda zahar bat zegoen tokian dagoena. Gorobeleko labarrean eskegita dago aterpe hori, Txarlazo mendiaren parean. Urduñako Txarlazo Mendi Taldeak eraiki zuen 1971. urtean, orduko udaletxe frankistaren traba burokratiko ete errepresiboak gaindituz. Azken hilabeteetako harri-erorketek, baina,  aterpeko sarbidea itxi egin dute eta debekatuta dago bertaratzea.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa