aiaraldea.eus

Toponimia eta etnografia topaketek Aztarna elkartearen museoaren ateak zabalduko dituzte

Erabiltzailearen aurpegia Aimar Gutierrez   Jendartea  Amurrio

Aztarna elkarteak 3. Toponimia eta Etnografia Topaketak antolatuko ditu urriaren azken asteburuan, Amurrioko Refor gunean. Elkarteak duen museo etnografikoak ateak irekiko ditu horretarako.

Toponimia eta etnografia topaketek Aztarna elkartearen museoaren ateak zabalduko dituzte
Antzinako lanabesen bilduma handi bat daukate Aztarnako kideek museoan. / Aiaraldea.eus | Ikusi handiago | Argazki originala

Aztarna elkarteak bi urterik behin antolatzen duen toponimia kongresuaren hirugarren edizioa antolatuko dute urriaren 27an Reforren.

9:30ean abiatuko da zita. Euskal Herriko, Burgoseko eta Errioxako toponimoak izango dituzte aztergai, besteak beste. Hainbat ikerlariren artean aurkeztutako sei ponentzietatik abiatuko dira horretarako. Eskualdeko izenen jatorriaz ere arituko dira. Jose Ignacio Salazarrek Urduñako jai eta santuen toponimia izango du ardatz eta Jesus Maria Garayok, aldiz, Gorobeleko toponimiari buruzko lan bat aurkeztuko du.

Egitarau guztia hemen kontsulatu daiteke.

Museo etnografikoa ikusteko parada
Aztarna elkarteak Reforren duen Museoan egingo dituzte topaketak. Elkarteko kideek hilabeteak daramate lanean museoaren berrantolaketa bukatzeko. Eginiko aldaketek “museo itxura handiagoa” eskaini diote espazioari eta, gauzak hala, biltegian zituzten hainbat altxor atera dituzte argitara, fosil bilduma handi bat, esaterako.

Urriaren 27ko topaketak ez dira izango, ordea, espazioa bisitatzeko egongo den aukera bakarra. Azaroaren 3an museoak berriz irekiko ditu ateak. San Pedro mendiko lubakietako 3. indusketa kanpainaren ondorio nagusiak aurkeztuko dituzte EHUko arkeologoek egun horretan.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa