Amurrioko Onomastika Topaketen III. edizioa egingo dute bihar, Refor eraikinean (Maskuribai kalea, 21). 9:30ean hasiko dira jardunaldiak eta 14:50etara arte luzatuko dira.
Hainbat hitzaldi eta aurkezpen egingo dituzte goizean. Urduña eta Gorobelgo onomastika eta toponimia izango dituzte hizpide, besteak beste. “Tokiko gaiak eta kanpokoa nahasten ahalegindu gara”, azaldu du Aztarna etnografia elkarteko Ramon Zurimendik. Elkarte hori arduratzen da topaketetarako beharrezko azpiegiturak lotzeaz, antolatzailea Onomastika Elkartea den arren.
Bi urtean behin egiten dute topaketa. “EAEn egiten den mota honetako ekimen bakarra da, eta erreferente bihurtzea lortu dugu”, azaldu du Zurimendik. Aztarnako kideak azaldu du topaketak manifestu batean duela jatorria. “Izenak zehazterako orduan tokian toki duten onarpena kontuan izatea eta artxiboetan ikertzea aldarrikatzen genuen idazki horretan”.
Gaur egun, aldiz, beste funtzio bat betetzen du ekimenak: Onomastikaren munduan aritzen diren pertsonen topalekua eta sortzen diren lanen “erakusleihoa" izatea. “Artxiboetan aritzen diren ikerlarien lana oso bakartia izaten da askotan, eta horrelako zitek elkar ezagutzeko aukera eman dezakete”.
15 euro balioko du jardunaldietan parte hartzeak. “Etnografia Museoa irekita egongo da goizean zehar, nahi duenak bisita dezan”.
EGITARAU OSOA
09:30 // III. Onomastika Topaketaren inaugurazioa
09:45 // Urduñako toponimiako santuak eta jaiak. José Ignacio Salazar Arechalde, abokatu ekonomista, Santurtziko Udaleko idazkaria
10:30 // Etnografia eta toponimia. Ikuspegi periferiko bat Aizkorrondotik. Aitor Azpiazu Ugalde, etnografia eta hizkuntzalaritzako zalea
11:15 // Oja Garaiko egungo toponimia eta toponimia historikoa: Ezkarai, Ojacastro, Valgañón eta Zorraquin (Errioxa). Jorge Matey Valderrama, Basoko ingeniari teknikoa
12:00 // Atsedena
12:30 // Salvada mendikateko toponimia. Jesús María Garayo Urruela teknikaria
13:15 // San Vicente haranaren (Burgos) inguruko onomastika geografikoa eta etnografia. Rufino Gómez Villar, La Laboral BHI (Logroño)
13:50 // Erronkaribarko etxe-izenak: bilketa eta sailkapena
Josune Aznarez Alkat, Euskal Filologian lizentziaduna, eta Maitane Baqué Garjón, Filologia Hispanikoan lizentziaduna.
14:30 // Galderak
14:50 // Topaketaren amaiera