Larunbatean 20:00etatik aurrera olerkiak, musikak eta dantzak bat egingo dute Amurrio Antzokiko oholtzan, euskaraz eta gazteleraz. 12 euro balioko du sarrerak, 10 euro bazkideentzat. Aiaraldea.eus-ek ere sarrerak zozketatuko ditu.
Ele! Lauaxeta-Lorca ikuskizuna Jon Maiaren sorkuntza da eta frankismoak fusilatutako bi poeten -Esteban Urkiaga "Lauaxeta" eta Federico Garcia Lorca- bizitzak eta testuak batzen ditu.
Berez, memoria historikoa eta herri ezberdinetako lagunek partekatu ditzaketen balioak jorratzen ditu lanak. Izan ere, Lauxetak gutun bidez proposatu zion olerkari andaluziarrari elkartzea. Jon Maiaren iritziz, bizkaitarrari miresmena eragiten zioten Lorcaren poesia eta filosofia herritarra.
Bertsolaria izan da obraren sortzailea eta gidoilaria. Horrez gain, antzezle lanetan arituko da larunbatean. Ele! Lauaxeta-Lorca proiektuaren talde tekniko osoa hurrengoa da:
- Egilea: Jon Maia
- Koreografoa: Andoni Aresti
- Ekoizpena: Karabansarai Produkzioak
- Gidoia: Jon Maia
- Zuzendaritza: Josu Cámara
- Musika: Gorka Hermosa
- Musika zuzendaritza: Jose Antonio Soria Pitti
- Antzezleak: Jon Maia, Ana Salazar, Arkaitz Pascuas, Angela Carbajo de Lera, Gorka Hermosa, Jesus Prieto.
- Jantzien diseinua eta errealizazioa: Leire Santillan
- Flamenkizatu (musika zuzenean): Jesús Prieto "Pitti" (gitarra), Gorka Hermosa (akordeoia)
- Hizkuntza: Euskara eta gaztelania (testua bi olerkarien jatorrizko lanean oinarritzen da)
- Iraupena: 85 minutu
- Publiko mota: Heldua
Aiaraldea hedabideak ikuskizunera joateko sarrera bikoitza zozketatuko du ostiralean.