“Eskerrik asko Amurrio”. Lelo horrekin eskertu nahi izan ditu Eroski supermerkatu kateak Amurrion dituen bezeroak, kateak martxan jarritako elkartasun ekimenetan gehien parte hartu dutenak izateagatik.
"Elkartasun Izarrak" egitasmoa
Eroskik urtero Gabonetan abian jartzen duen ekimena da “elkartasun-izarren” salmenta. 2 euroko kostua dute izarrek eta, aurten, ateratako dirua UNICEF erakundeari emango diote, pobrezian bizi diren haurrak laguntzeko.
Amurrioko Eroski saltokia izan zen 2017an izar gehien saldu dituen denda. Horretan bakarrik ez, beste hainbat egitasmotan ere amurrioarrek parte hartze handia dutela gogorarazi dute Amurrioko Eroskiko arduradunek: “elikagai bilketa, poltsa-solidarioa, janaria alferrik ez botatzeko sentsibilizazio kanpainak…”.
Eli Pinedo eskubaloi jokalari amurrioarra bertaratu zen herriko saltokira langileei Eroskiren izenean esker ona adieraztera. Langileek protagonismo guztia amurrioarrena dela adierazi dute, “oso pozik gaude aitortzarekin baina Amurrioko herritarrei esker izan da guztia, herri ederra baita”.
“Eskerrik asko Amurrio” jaialdia
Aitortza jaia 18:30ean hasiko da, Amurrioko Juan de Urrutia Plazan. Amurrioko Eroski saltokiko langileek parte hartuko dute bertan, besteak beste. UNICEF eta AEFAT erakundeetako kideak ere egongo dira bertan. Ataxia-telangiektasia gaixotasunaren ikerkuntzaren alde lan egiten duen elkartea da AEFAT.
Sare sozialetatik ere ekitaldiaren jarraipena egingo duela iragarri du Eroski taldeak, #EskerrikAskoAmurrio traola erabilita.
Sorpresaz betea egongo da ekitaldia, antolatzaileek “musika eta argi ikuskizuna” iragarri dituzte. Herriko txikienek ere izango dute ondo pasatzeko aukera, eurei zuzendutako txokolatada egongo baita.