Eskaintza oparoa eskainiko du Haziaraba jaialdiak Amurrion 1-6 urte bitarteko haurrentzat, udalarekin elkarlanean. Hiru ekintza egingo dituzte guztira, hirurak Amurrio Antzokian. 1-6 urte bitarteko haurrei eta euren familiei zuzenduak egongo dira jarduerak.
Datorren igandean -abenduak 16- izango da lehen zita eta 1-4 urte bitarteko umeei bideratua egongo da. Dantzaz konpainiak Ehuna ikuskizuna taularatuko du. Bi dantzari igoko dira eszenatokira, “emozioz jositako jantziak” osatzeko.
Bigarren jarduera hilaren 27an egingo dute: Naturalario zinema-emanaldia. 3-6 urte bitarteko ikusleentzako saioa izango da. Filma laburrak, 3D formatuko marrazki bizidunak eta stop motion animazioak uztartuko ditu proiekzioak, Gaztefilm eta Kalakalaben eskutik.
Abenduaren 29an izango da azken zita. Basoko haziak joko-gunea atonduko dute antzokian. Hainbat materialekin sormena lantzeko aukera izango dute bertan 1-4 urte bitarteko haurrek. Teatro Paraisok dinamizatuko du saioa, Gutxinaka-Gutxinaka taldearekin elkarlanean. Leku mugatuak egongo dira. Horregatik, tailerrean ume eta heldu bana baino ezingo dute parte hartu familia bakoitzeko.
Sarrerak Kultur etxean salgai
Hiru emanaldiak arratsaldeko bostetan hasiko dira (abenduaren 29an bigarren pase bat egongo da 18:30ean) eta sarrerek 4 euro balioko dute (3 euro antzokiko bazkideak direnentzat). Kultur etxean eskuratu daitezke tiketak.