Altzarrate eta Kaskagorri futbol taldeek "berdintasuna aldarrikatzeko martxa" antolatu dute bigarren aldiz. Martxoaren 10ean izango da zita, 10:00etan. Hala, Amurrioko eta Laudioko herriko plazetatik abiatuko dira partaideak, Luiaondon topo egiteko. Bertan egingo dute, hain zuzen, hamaiketakoa. Izen emateak 5 euro balioko ditu eta elastiko teknikoa jasoko dute kirolariek opari gisa. Orotara, 12.4 kilometroko bidea osatu beharko dute aiaraldearrek.
Gaur goizean aurkeztu dute egitasmoa Amurrioko udaletxean. Amurrioko eta Laudioko alkateek hartu dute parte Kaskagorri eta Altzarrateko ordezkariekin batera. Futbol taldeetako ordezkarien esanetan, zenbait hobekuntza gauzatu dituzte: "Iaz 300 pertsona espero genituen, eta Amurrion 700 egon ziren, horietatik 100ek egunean bertan eman zuten izena. Irteera ordua atzeratzea eragin zuen horrek". Hala, otsailaren 22 arte egongo da izena emateko aukera, Amurrioko Kultura Etxean, Laudioko Berdintasun arloan zein Altzarrateren bulegoan. "Martxoaren 1etik 10era kamisetak banatuko ditugu, irteera arintzeko". Luiaondo izango da horniketa eta denbora kontrol gunea. Aurten, gainera, komunak jarriko dituzte bertan partaideentzat. Kirolariek autobus zerbitzua izango dute euren abiapuntura itzultzeko.
Lehia gabeko proba
Antolatzaileen hitzetan, aurten ere ez da lehiaketarik izango. Josune Irabien Amurrioko alkateak ekintzaren balioa azpimarratu du: "Txalogarria da denbora marka gabe aritzea, gozatzea eta aldarrikatzea baita helburua. Berdintasun arloan hausnarketarako baliagarria izan litekeen martxa da". Gentza Alamillo gobernuburu aiararrak parte hartzeko adina nabarmendu du: "Berdintasuna adin goiztiarrean lantzeko aukera ematen du jarduerak, baita familien artean ere".
Luiaondo izango denez topalekua, Parke Linealaren sozializazio gaitasuna ekarri du gogora alkateak: "Egunero jende asko ibiltzen da Parke Linealetik, sozializaziorako oso inportantea da Luiaondoko zatia". Hori dela eta, aiararrak parte hartzera animatu ditu alkateak. Natxo Urkixo Laudioko alkateak, berriz, kirola ahalduntzeko eremu gisa indartu du, "gazteria kirolean ahalduntzeko proba da, lehiarik gabekoa. Kirolaren alor hori berreskuratu beharko genuke, oso gutxitan heltzen baitiogu".
