aiaraldea.eus

Udalera iritsi da apustu-etxeen gaineko eztabaida

Erabiltzailearen aurpegia Txabi Alvarado Bañares   Politika  Amurrio

Orain Amurriok aurkeztutako mozioa eztabaidatu zuten urteko lehen Udal Osoko Bilkuran. PPren bi mozio ere eztabaidatu ziren.

Udalera iritsi da apustu-etxeen gaineko eztabaida
Bi joko-areto daude eskualdean. / Aiaraldea.eus | Ikusi handiago | Argazki originala

Geroz eta zeresan handiagoa sortzen du apustu-etxeen presentziak eskualdean. Duela astebete Ernai gazte antolakundeak ekintza bat burutu zuen Amurrion dagoen mota horretako establezimenduaren aurka:

Iragan ostegunean, aldiz, Orain Amurrio talde politikoa izan zen eztabaida Udal Osoko Bilkurara eraman zuena, mozio baten bidez. Apustu-etxeen presentzia nola mugatu aztertzea eskatzen zuen testuak. Arazoa “kolektiboa” dela nabarmendu zuen Kepa Gonzalez zinegotziak, “neurri prebentiboak” hartzearen garrantzia azpimarratzearekin batera. Herriko kirol taldeekin hitz egitea ere proposatu zuen Orain Amurrioko ordezkariak, “beharrizan ekonomikoak medio apustu etxeekin harremanetan jartzea ekiditeko”.

PSE eta PP abstenitu egin ziren bozketan, eta gainontzeko taldeek alde bozkatu zuten. Alderdi Popularreko zinegotziak -Montse Canivek- adierazi zuen ulertzen duela arazo larria dela, “baina udalak ezer gutxi egin dezake, kontzientziazio kanpainak baino ez”. PSE-EEk, bere aldetik, mozioak eskatzen zituen zenbait gauza udalaren eskumenetik at egon daitezkeela azaldu zuen. EAJk, bere aldetik, Amurrion zein eskualdean egin diren prebentzio kanpainen garrantzia jarri zuen mahai gainean.

PPren mozioak
Alderdi Popularrarenak izan ziren Udal Osoko Bilkuran eztabaidatu ziren beste bi mozioak. Autobus-geltokietatik hurbil bizikletak aparkatzeko tokiak jartzea proposatu zuen lehenbizi, eta aho batez onartu zen ideia.

Bestetik, San Mameseko etxe komunitarioan larrialdi zerbitzuak abisatzeko gailu indibidualizatuak jartzea eskatu zuen Canivek, “gauzak hala, larrialdi zerbitzuetakoak iristen direnean laguntza nork eskatu duen jakin ahalko dute, gainontzeko erabiltzaileak gogaitarazi gabe”. Proposamen horrek talde politiko guztien babesa jaso zuen baita ere.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa