Elurrak bisita egin dio eskualdeari asteburuan, eta asko izan dira mendira joandako aiaraldearrak. Ivan Ruiz Rotaeche izan da horietako bat. Lendoñogoitik Iturrigorrira igo ziren, "bidea zabaltzen". Mendi kuttunena izanik eurentzat, itxaropentsu hasi zuten eguna, tontorrera iristeko asmoz.
Izan ere, elurrak irentsi zuen bidea: "Galdakaoko bi mendizaleri bide zuzena erakutsi genien galduta zeudelako. Bidea zabaldu genien". Lana eskertu zieten, zapaldu gabeko elurra baitzuten aurretik.
Denboraleari haizetea gehitu zitzaion, ordea, "horrek zaildu egin zuen Senda Negra delako bide bertikala, abentura puntua gehituz". Jaitsieran kontuz ibili zirela azpimarratu du mendizaleak. Mendiko Lagunaken "Goizale" aterpetxean hamaiketakoa eginda bueltatu ziren abiapuntura, Lendoñogoitira.
Lainoa, haizea, elurra eta hotza izan zituzten bidelagun, beraz, ibilbidean barrena. Gogoak, ordea, ez zien helmuga eragotzi. "Goiz pasa ederra izan zen". Negua geratzeko etorri dela dirudienez, parada gehiago izango dituzte mendizaleek inguruko paisaia zuriez gozatzeko.
Argazkiak: Ivan Ruiz Rotaeche