aiaraldea.eus

Madrilen “euskaldunen eta arabarren interesak defendatzeko berme bakar” gisa aurkeztu da EAJ Aiaraldean

Erabiltzailearen aurpegia Txabi Alvarado Bañares   Politika  Amurrio
Madrilen “euskaldunen eta arabarren interesak defendatzeko berme bakar” gisa aurkeztu da EAJ Aiaraldean

Ekitaldi jendetsua egin du EAJk gaur eguerdian Amurrioko San Anton plazan Aiaraldeko hautagaiak aurkezteko. Hainbat pertsonek hartu dute hitza: Araba Buru Batzarreko presidentea den Jose Antonio Susok, Amurrioko alkatea den Josune Irabienek eta Arabako diputatua den Mikel Legardak, Andoni Ortuzarrekin batera.

Suso izan da hitz egin duen lehena. Aiarako bost udaletan eta Arabako Batzar Nagusietan aritu diren jeltzaleek lana eskertu du politikariak. “Ibilbide bat daukagu, esperientzia daukagu. Kalean gaude. Proiektuak ditugu. Garatu nahi ditugun ideiak ditugu eta egingarri egin dezaketen jendea daukagu: jenderik onena”.

Irabien izan da mikro aurrean jarri den bigarrena. Amurrioko alkateak amaitzear dagoen agintaldiaren balorazioa egin du eta datozen lau urteetan garatzeko asmoa duen proiektuak izan ditu hizpide. Era berean, Espainiako Gobernuari eskatu dio Aiaraldearekin hartu dituen konpromisoak betetzea.

Konpromiso horiek ere izan ditu hizpide Legardak. Basaurbe eta Markixanako araztegien proiektua izan du hizpide Foru Aldundiko diputatuak, eta gaineratu du EAJ indartsu dagoenean “Arabari ondo doakiola”. “Oso berezia da Aiaraldea, eta EAJri ere antzeko zerbait gertatzen zaio”, nabarmendu du politikariak. Bere hitzetan, alderdi jeltzaleari botoa ematea da “Euskal agenda” aurrera ateratzeko modu bakarra.

Ortuzarren hitzak  
Andoni Ortuzar izan da mintzatu den azken hizlaria. Ironiaz betetako hitzaldia eskaini du Euskadi Buru Batzarreko presidenteak. “Txori migratzaileen” metafora baliatu du Espainiako alderdi politikoen jarrerak azaltzeko. “Alderdi horiek guztiak ados jarri dira gauza batean: ez dutela EAJrekin akordiorik egingo”. Horrez aurrean, Ortuzarrek ziurtatu du EAJ izango dela akordioa baietz edo ezetz esango diena, “ez alderantziz”. Zentzu horretan, politikari jeltzaleak honako ohartarazpen hau helarazi die gainontzeko alderdiei: “EAJren botoak nahi dituenak Euskal Agenda onartu beharko du, bai ala bai”.

Ikusi argazki guztiak handiago

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa