Orain Amurriok prentsa-oharra plazaratu du Udaleko Gobernu Batzordeak energia elektrikoa kontratatzearen inguruan hartutako erabakia salatzeko. Oposizioko talde politikoaren arabera, energia elektrikoa kontratatzeko erabaki horrek ez du bat egiten udalak energia berriztagarrien alorrean hartutako konpromisoekin. 2017ko urtarrilean onartutako mozio bat ekarri du gogora Orain Amurriok: “Bertan eskatzen zen energia elektrikoko kontratazio publikorako baldintza pliegoetan, gizarte eta ingurugiroaren inguruko klausulak sartzea udal instalazioen hornidurarako”. 2019ko otsailean gaiari buruzko beste mozio bat aurkeztu zuen talde politikoak, “gobernu taldea konprometitzeko asmoz”.
Gauzak hala, udalak “berriro huts egin duela” uste du Orain Amurriok, kontratazio hori “urrun” dagoelako “jasangarritasun energetikoaren legea betetzetik”. Horrez gain, oposizioko taldeak salatu du Arabako Foru Aldundiaren bidez kontratatuko litzatekeen enpresak ez duela “100% energia berriztagarrien ziurtagiria betetzen. Honek ez luke beteko Europako 2012/27/UE direktiba, legalki loteslea dena. Gainera, Amurrioko udalak ez luke beteko mozioaren bidez hartutako konpromisoa”.
Horrez gain, “erosketa bateratuak” ekonomia sozialeko enpresa txikiei “kalte” egiten diela uste du Orain Amurriok. Horrez gain, Arabako Foru Aldundiak indarrean daukan kontratua “sorta bakarrean” egin zela salatu du, “2014/24/UE kontratazio publikoaren inguruko direktibak dionaren arabera nahitaezkoa denean sorta desberdinetan banatzea enpresa txikiei kontratu publikoetara heltzeko erraztasuna bermatzeko”.
Gauzak hala, kontratazio hori egitearekin “udalaren kudeaketa zuzena” galtzen dela uste du Orain Amurriok. “Gainera, ez dira ingurugiroaren eta kontratazio publikorako legediak aintzat hartzen. Guzti honengatik ez gatoz bat gobernu batzordeak hartutako erabakiarekin”.
Aiaraldea hedabidea Amurrioko Udal Gobernuko ordezkariekin jarri da harremanetan gaiaren inguruan galdetzeko, baina ez dute adierazpenik egin nahi izan.