Haurrei bideratutako zenbait ekintza egingo ditu aste honetan Amurrioko Udalak. Zehazki, 17:00etatik 19:00etara izango dira jarduerak, San Anton plazan. Tailerrak eta jolasak tartekatuko dituzte egunez egun. "Jalgi Hadik aisialdirako eta entretenimendurako espazioa eskaintzen die 3 eta 12 urteko haurrei", zehaztu du tokiko erakundeak prentsa oharrean.
Hala, errespetua, elkarbizitza,elkartasuna, sormena eta berdintasuna sustatu nahi dituzte, "euskararen erabilera ahaztu gabe".
Gaur hasiko da programa, jolas erraldoiekin. "Eskuz egindako 20 jolas klasiko eskainiko dira, egur naturalarekin".
Bihar, berriz, xaboizko ponpak egongo dira, makina erraldoiak baliatuta. Horrez gain, umeentzako yoga tailerra prestatu dute, adinaren arabera bi saiotan bereizita: 17:00etatik 18:00etara 3-6 urtekoek izango dute horretarako aukera, eta 18:00etatik 19:00etara 7-12 urte artekoek. Yoga praktikatzeko, baina, Kultura Etxean eman beharko da izena.
Ostegunean, berriz, patinaje tailerra antolatu dute, Amurriopatin elkartearen eskutik. Gainera, minigolfean aritzeko euskarriak jarriko dituzte, hainbat zelai eta oztopo.
Ostiralean amaituko da egitaraua, "Dibertitxok" saioarekin. Udalak aurreratu duenez, autotxoke ekologikoak ekarriko dituzte, "flotagailuak erabilita egiten dituzte". Kulturmagic enpresa kontratu dute "Jalgi Hadi" programa garatzeko.