Amurrio Trail Taldeak lorpen berria eskuratu zuen Bilbon igandean. Izan ere, VII. Laboral Kutxa Bilbo Mendi Trail Lasterketaren taldekako kategorian irabazi zuen.
Berez, 32 kilometroko eta 1800 metroko desnibela zuen ibilbidea bete zuten guztiek salbu Aitor Izagirrek, 22 kilometroko bideari ekin baitzion.
Axier Vivanco lasterkariak azaldu du proba gogorra izan zela: "Azkarra izan zen, irteeratik jendea azkar atera zen, Arnotegiko bidea hartu genuen gero; Gangoiti, Ganetako mendiak igo genituen Pagasarrira heldu baino lehenago. Ondoren, lasterketak Collado de Pastorekorta pasatu zuen, eta Etxebarri bidea hartu zuen Monte Avrilera igotzeko. Azkenik, Bilboko eraztun berdetik pasatu zen, La Salveko zubitik hiriko erdigunera sartzeko. Itsas Museoan zegoen helmuga".
Amurrio Trail Taldeko lehenengo hiru sailkatuak izan ziren Axier Vivanco 3:14:33 (19. postua), Asier Fernandez 3:15:55 (21. postua) eta Iñaki Isusi 3:20:42 (29. postua) izan ziren.
Marka horiei esker gailendu ziren amurrioarrak taldekako kategorian. Emaitzarekin oso pozik daudela ziurtatu dute: "Lasterketa polita izan zen eta eguraldi bikaina izan genuen korrika egiteko, gainera ez zegoen lokatzik... horrek azkarragoa egin zuen proba".
Hala ere, Amurriokoak pentsatzen ari dira zein izango den euren hurrengo helburua. Axier Vivancok adierazi duenez, orain Euskal Herriko mendi erronkari begira daude. "Maiatzaren 18an Leitzan 67 kilometroko lasterketa eta 3.700 metroko desnibel positibokoa izango da". Bere urteko erronka pertsonala, ordea, Beasaineko Ehunmilak proba izango da: "168 kilometroko lasterketa eta 11.000 desnibel positiboa uztailaren 12an. Horretarako gaude ia urte osoko prestakuntza egiten".