Gasteizko Udal Folklore Akademiak Amurrio aukeratu du Arabako txistulari gazteak elkartzeko. Kontzertu berezia prestatuko dute, 37. edizioa izango da. Amurrion egingo duten bigarren aldia izango da: maiatzaren 25ean jarri dute zita, 19:30ean San Anton plazan, hain zuzen.
Euskal herriko Txistulari elkarteak azaldu duenez, emanaldiak hainbat musika eskoletatik etorritako 100 bat txistulari bilduko ditu: "Urtero Arabako herri batean ospatu ohi da eta aurtengoan Amurriora helduko da maiatzaren 25ean. Aiaraldeako herrian 1996an ospatu zen lehenengoz kontzertu hau. Horregatik, Amurrioko Txistuzaleak taldetik proposamena helarazi zieten antolatzaileei aurtengo edizioa bertan izateko".
Ez dira txistulariak bakarrik oholtzaratuko, ordea. Izan ere, dantzariak izango dituzte lagun. Zehazki, Aiara Dantza Taldea arituko da eurekin batera. Berezitasunen artean, soinu tresnen aniztasuna nabarmendu dute: "Kontzertuak bereizgarri du txistuarekin batera beste euskal soinutresnak ere entzun daitezkeela: trikitixa, alboka, txirula eta nafar gaita. Halaber, baxuak, bateriak, perkusioak eta teklatuak osatzen dute musika tresnen zerrenda".
