Orain Amurrio udal taldeak prentsa oharraren bidez adierazi du berriro Bañueta Kiroldegiaren kudeaketa guztiz publikoa bilakatzeko beharra. Horretarako, salatu du lizitazio berria maiatzaren 13an aurkeztu zela; eta EAJk, PPk eta PSE-EEk babestu zutela.
Gauzak horrela, Orain Amurriok aurreratu du gaur onartuko dela kontratua, hau da, hauteskundeak baino 3 egun lehenago. Talde independenteak gogoratu du birritan geratu dela bertan behera esleipena enpresarik ez zelako aurkeztu. "2017an 116.000 euro ordaindu zituen udalak defizitari aurre egiteko, eta 80.000 euro 2018an".
Opozisioko taldeak azaldu duenez, kontratazio baldintzak aldatu egin dira behin baino gehiagotan enpresentzako erakargarriak suerta zitezen, "baina guk gure buruari galdetzen diogu ea jokaera hau udal interesentzako eta kiroldegiko erabiltzaileentzako onuragarria den".
Zentzu horretan, taldeak erantsi du gogora ekarri behar dela Udalaren kudeaketa: "Amurrio Bidean S.A.U. Garapen Ekonomikorako Sozietate publikoaren bitartez (ehuneko ehunean kapital publikoarekin sortua), ez luke enpresa pribatu horien mozkinik zertan kontuan izan behar".
%30eko tasa igoera 15 urtetan
Horrez gain, udalean aritzen den talde politikoak salatu du maiatzaren 16ko udalbatzan onartu zela tasen igoera. Orain Amurriok jakinarazi du %2ko igoera emango dela urtero hurrengo 15 urteetan eta horrek kuota %30 garestituko duela guztira.
Taldeak aipatu du KPI baino gehiago dela igoera eta hori soilik justifikatzen dela enpresa pribatu kudeatzailearen mesedetan. Ondorioz, ziurtatu dute hori argudio bat gehiago dela zerbitzua publikoa izateko.